Թեթեւ արդյունաբերության ոլորտի վեց ընկերություններ միասնական տաղավարով Հայաստանը ներկայացնում են Մոսկվայում այսօր՝ օգոստոսի 30-ին բացված «ՏեքստիլԼեգՊրոմ» 49-րդ ցուցահանդեսին։
Հայկական տաղավարը ներկայացված է տեքստիլի միջազգային էքսպոյին. 400 մլն դրամի արտահանման պատվերներ կան
ՍՏԵՓԱՆԱԿԵՐՏ, 30 օգոստոսի, ԱՐՑԱԽՊՐԵՍ: Հայաստանի զարգացման հիմնադրամի աջակցությամբ հայկական ընկերությունները միջազգային էքսպոյին մասնակցում են արդեն 5-րդ անգամ։ Նախկին ցուցահանդեսների մասնակից բոլոր ընկերություններն արտահանման պատվերներ են ստացել։
«Միայն փետրվարի ցուցահանդեսից հայկական ձեռնարկությունները 400 միլիոն դրամի արտահանման պատվերներ են ստացել։ Ընդ որում, ամեն հաջորդ ցուցահանդեսից հետո պատվերների քանակը նկատելիորեն ավելանում է»,- նշել է ՀԶՀ Միջոցառումների կազմակերպման խմբի ղեկավար՝ Մարկուս Ազադյանը։
«Հայկական արտադրանքի արտահանման զգալի աճը, մասնավորպես Ռուսաստան, պայմանավորված է կառավարության, Տնտեսական զարգացման եւ ներդրումների նախարարության արդյունավետ քաղաքականությամբ եւ հատկապես արտադրության ու արտահանման խթանման ծրագրերով»,- միջոցառման բացման արարողությանը նշել է ՌԴ-ում ՀՀ առեւտրային ներկայացուցիչ Կարեն Ասոյանը։
Հայաստանի զարգացման հիմնադրամից հայտնում են, որ տեքստիլ ու թեթեւ արդյունաբերության արտադրանքի ու սարքավորումների Ռուսաստանի խոշորագույն ցուցահանդեսն անցկացվում է տարեկան երկու անգամ, 40 000 քմ տարածք զբաղեցնող 9 սրահներում։ «ՏեքստիլԼեգՊրոմ» 49-րդ էքսպոյին մասնակցում են ավելի քան 200 ընկերություններ աշխարհի 28 երկրներից։ Սպասվում են 35 000-ից ավելի այցելուներ` մեծածախ գնորդներ, ոլորտի մասնագետներ, առեւտրային ցանցերի ներկայացուցիչներ, ներմուծողներ։
«Լենտեքս», «Հելլո», «Արշալույս», «Ալեքս տեքստիլ», «Ֆիրմա Լիդա» ընկերությունները, Կամսար Դարբինյան ԱՁ-ն միասնական տաղավարով ներկայացնում են Հայաստանի թեթեւ արդյունաբերության ոլորտը՝ տրիկոտաժի, գուլպեղենի, հագուստի սեփական արտադրության հավաքածուներով:
