Այսօր ԱՀ Ազգային ժողովի նախագահ Աշոտ Ղուլյանն այցելել է Արցախի պետական համալսարան, հանդիպել պրոֆեսորադասախոսական կազմի և ուսանողության հետ ու անցկացրել «Արիության դաս»:
ԱրՊՀ-ում ԱՀ ԱԺ նախագահն անց է կացրել «Արիության դաս»
ՍՏԵՓԱՆԱԿԵՐՏ, 1 սեպտեմբերի, ԱՐՑԱԽՊՐԵՍ: «Արցախպրես»-ի հաղորդմամբ՝ ԱՀ կրթության, գիտության և սպորտի նախարար Սլավա Ասրյանի ու ԱրՊՀ ռեկտոր Մանուշ Մինասյանի ուղեկցությամբ Խորհրդարանի ղեկավարը հարգանքի տուրք է մատուցել արցախյան ազատամարտում զոհված ուսանողների հիշատակին՝ ծաղիկներ դնելով նրանց հուշակոթողին:
Խորհրդարանի ղեկավար, ԱրՊՀ խորհրդի նախագահ Աշոտ Ղուլյանն նախ ամփոփ ներկայացրել է 26-ամյա հանրապետության անցած ուղին, նրա ձեռքբերումները, ապա անդրադարձել համալսարանի առաջիկա ծրագրերին ու անելիքներին: Ա. Ղուլյանը, շնորհավորելով առաջին կուրս ընդունված ուսանողներին, մասնավորապես ասել է. «Խորհրդանշական է, որ այսօր հիմնական միջոցառումները սկսում ենք ԱրՊՀ-ից: Բուհի ուսանողությունը և դասախոսական կազմը կանգնած են եղել ազգային-ազատագրական պայքարի ակունքներում, և մեր պարտքն է ամեն անգամ հարգանքի տուրք մատուցել հայրենիքի ազատության ու անկախության պայքարին նվիրաբերած ուսանողների հիշատակին»:
Իր խոսքում ԱՀ կրթության, գիտության և սպորտի նախարար Սլավա Ասրյանը, նշելով Գիտելիքի օրվա և Անկախության տոների կարևորության մասին, առաջին կուրսեցիներին նաև պատգամել է լավ սովորել ու դառնալ այնպիսի մասնագետներ, որոնք կապահովեն Արցախի տնտեսության բնագավառում առաջընթաց:
ԿԳ նախարարն ափսոսանք է հայտնել, որ այս տարի քիմիա ու կիրառական մաթեմատիկա մասնագիտությունների գծով բաժիններ չեն ձևավորվել. այս խնդիրը կա բնական մյուս գիտությունների բաժիններում ևս:
Իսկ ԱրՊՀ ռեկտոր Մանուշ Մինասյանը ներկայացնելով համալսարանի այս տարվա հաջողությունները, պատմել է, որ հայ-ամերիկյան համալսարանի հետ իրենց համագործակցութ-յունն ընդլայնվել է: ԱրՊՀ հանրակացարանի հին մասնաշենքի սկսված բարեկարգման աշխատանքներն ընթացքի մեջ են: Հաջորդ տարի էլ նախատեսվում է կազմակերպել ամառային դպրոց: