Այսօր` սեպտեմբերի 22-ին, Ստեփանակերտի Հանրապետական բժշկական կենտրոնում սկսվել է Երևանի «Իզմիրլյան» բժշկական կենտրոնից ժամանած բժիշկների անվճար հիմունքներով քաղաքացիների ընդունելությունը և խորհրդատվությունը:
«Իզմիրլյան» բժշկական կենտրոնի բժիշկները Ստեփանակերտում անվճար ընդունելություններ են կատարում
ՍՏԵՓԱՆԱԿԵՐՏ, 22 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում ուրոլոգ Շահեն Դանիելյանը նշել է, որ Հանրապետական հիվանդանոցը հնարավորություն է տալիս կատարել տարբեր հետազոտություններ: «Մենք այստեղ իրականացնում ենք կոնսուլտացիոն ծրագիր, ինչպես նաև՝ փորձի փոխանակում, և այն հնարավորություն է տալիս երկու հիվանդանոցների բժիշկներին քննարկել տարաբնույթ հարցեր»,- ասել է Շ. Դանիելյանը: Նրա խոսքով՝ այսօրվա ընթացքում ընդունել է 30 այցելուի:
Պրոկտոլոգ Սամվել Պողոսյանն էլ նշել է, որ հետազոտել է 9 հիվանդի, որոնցից 8-ին նշանակվել է կոնսերվատիվ, դեղորայքային բուժում. ևս մեկ հիվանդի համար նախատեսվում է վիրահատություն:
Իսկ թոքաբան Մարինե Պետրոսյանն էլ ասել է, որ իր այցելուների մեջ հիմնականում մեծ թիվ են կազմում այն հիվանդները, որոնք կարիք ունեն մշտական բուժման: «Մեր խնդիրն է հետազոտել հիվանդներին: Իսկ անհրաժեշտության դեպքում պատրաստ ենք նաև անհետաձգելի վիրահատություններ իրակացնել»,- ասել է բժիշկ-թոքաբանը: Մ. Պետրոսյանն ավելացրել է, որ սա իր երրորդ այցելությունն է Ստեփանակերտի Հանրապետական հիվանդանոց և նախատեսում է աշնանը կրկին այցելել:
Նշենք, որ «Իզմիրլյան» բժշկական կենտրոնից ժամանած բժիշկների անվճար հիմունքներով քաղաքացիների ընդունելությունը և խորհրդատվությունը շարունակվելու է նաև վաղը:
Հավելենք, որ «Իզմիրլյան» բժշկական կենտրոնից Արցախ են ժամանել օրթոպեդ-վնասվածքաբան, ընդհանուր վիրաբույժ, ուրոլոգ, պրոկտոլոգ, գաստրոէնտերոլոգ, քիթ-կոկորդ-ականջաբան, նյարդաբան, էնդոկրինոլոգ, համակարգչային տոմոգրաֆիստ, սոնոգրաֆիստ, թոքաբան, ինչպես նաև Մոր և մանկան առողջության պահպանման կենտրոնում` գինեկոլոգ և Մաշկավեներոլոգիական դիսպանսերում` մաշկաբան:
