Երեկ՝ սեպտեմբերի 23-ին Ստեփանակերտի «Վալլեքս Գարդեն Սինեմա» կինոդահլիճում տեղի է ունեցել «Նա, ում սպասում էին» կատակերգական ֆիլմի առաջնախաղը։
Ստեփանակերտում կայացել է «Նա, ում սպասում էին» ֆիլմի առաջնախաղը
ՍՏԵՓԱՆԱԿԵՐՏ, 24 սեպտեմբերի, ԱՐՑԱԽՊՐԵՍ։ Ֆիլմի սյուժեն ծավալվում է ադրբեջանահայկական սահմանին, մենաներկայացում խաղալու նպատակով Ադրբեջան ժամանած դերասան Ժան-Պոլ Բոլզեկը հանգամանքների բերումով հայտնվում է սահմանամերձ մի տարածքում, անսարք տաքսիում։ Նա ստիպված է լինում ոտքով անցնել մի որոշ տարածություն և առանց իմանալու հատում է Հայաստանի սահմանը ու հայտնվում հայկական մի գյուղում։
Այնտեղ նրան սկզբում ադրբեջանական գործակալի տեղ են դնում, ապա ընդունում և պատվում՝ կարծելով, թե վերջապես ժամանել է գյուղի առասպելներից ծնված ու վաղուց սպասված՝ գրեթե համահունչ ազգանունով ֆրանսիահայ բարերարը՝ Բոլզաքյանը, որը եղեռնից մազապուրծ հայի զավակ լինելով՝ իբրև թե վերադարձել է հայրենիք այն շենացնելու նպատակով։
Ստեփանակերտում «Նա, ում սպասում էին»-ի ցուցադրությունից առաջ հանդիսատեսին տեսաուղերձով ողջունեց ֆիլմի ֆրանսիահայ կինոռեժիսոր Սերժ Ավետիքյանը և նշեց՝ հպարտ է, որ իր ֆիլմը ցուցադրվում է նաև Արցախում։
«Արցախպրես»-ի թղթակցի (Աննա Պետրոսյան) հետ զրույցում ֆիլմի հայկական կողմի պրոդյուսեր Միայել Դովլաթյանն ասաց, որ 1 ժամ 30 րոպե տրողությամբ ֆիլմը նկարահանվել է երկու՝ ֆրանսիական ու հայկական ընկերությունների կողմից և հագեցած է հայկական ու ֆրանսիական հումորով։
«Ես շատ ուրախ եմ, որ իմ ֆիլմի առաջնախաղը կայացավ նաև Արցախում։ 2015 թ-ին սկսել ենք նախապատրաստական աշխատանքները․նկարահանումները տեղի են ունեցել Խաչիկ գյուղում, որին մասնակցել են նաև գյուղի բնակիչներն ու այնտեղ տեղակայված զորամասի զինվորները․ դա իր հերթին ֆիլմին յուրահատուկ գույներ է տվել»,-մանրամասնեց Մ․ Դովլաթյանը։
Պրոդյուսերը նաև նշեց, որ ֆիլմի համահայկական առաջնախաղը առաջին անգամ եղել է հենց Խաչիկ գյուղում։ «Բուն նկարահանումնեը տևեցին ամսուկես։ Ֆիլմը շատ հետաքրքիր է և հեշտ ընկալելի չէ, բայց մտածելու տեղիք է տալիս։ Շատ բարի ժապավեն է ստացվել»,-հավելեց նա։
Ֆիլմի դերասան Ստեփան Ղամբարյանն էլ ասաց, որ թեկուզ նա նկարահանվել է տարբեր ֆիլմերում, բայց «Նա, ում սպասում էին»-ը ունի իր առանձնահատուկ տեղը։
«Դերի կենսագրությունն ու պատմությունն ինձ համար ամբողջովին նոր էր․ սա այն գյուղացի տղան չէր ում մենք պատկերացնում էինք, կամ այն կարծրատիպը չէր, որ մենք ունեինք գյուղացու հանդեպ։ Ֆիլմն առանձնանում է նաև նրանով, որ առաջնախաղը ցուցադրվեց Արցախում, որովհետև ես Արցախը յուրահատուկ ձևով եմ սիրում և այն յուրաքանչյուր հայի ամենակարևոր օջախն է, որտեղ մենք փորձել ենք ներկայանալ բարձր մակարդակով։ Մեր պայքարի ձևն էլ մշակութայինն է, մենք էլ այս ձևով ենք մեր խնդիրը ներկայացնում ամբողջ աշխարհին»,-պարզաբանեց Ս․ Ղամբարյանը։
Կինոթատրոնի մենեջեր Արթուր Կարապետյանը տեղեկացրեց, որ սեպտեմբերի 23–ից սկսած ֆիլմն ամեն օր ցուցադրվելու է «Վալլեքս Գարդեն Սինեմա» կինոդահլիճում։