Հոկտեմբերի 26-ին տեղի է ունեցել Ազգային ժողովի 6-րդ նստաշրջանի լիագումար նիստը:
Կխթանվի ոգելից խմիչքների արտադրությունը. խորհրդարանը լիագումար նիստ է գումարել
ՍՏԵՓԱՆԱԿԵՐՏ, 26 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ԱՀ Ազգային ժողովի նախագահ Աշոտ Ղուլյանը պատգամավորներին է ներկայացրել օրակարգում տեղ գտած հարցերը:
Օրակարգի համաձայն` « Լեռնային Ղարաբաղի հանրապետության կառավարության կառուցվածքի մասին» ԼՂՀ օրենքն ուժը կորցրած ճանաչելու մասին ԱՀ օրենքի նախագիծը ներկայացրել է ԱՀ նախագահի աշխատակազմի կառավարության գործերի կառավարչության պետ-աշխատակազմի ղեկավարի առաջին տեղակալ Արայիկ Լազարյանը:
Ա. Լազարյանի խոսքով՝ նախագծի ընդունման անհրաժեշտությունը պայմանավորված է այն հանգամանքով, որ համաձայն ԱՀ Սահմանադրության կառավարության և պետական կառավարման այլ մարմինների կառուցվածքը սահմանվում է Նախագահի հրամանագրով:
«Նախորդ Սահմանադրությամբ այս գործառույթն իրականացվում էր օրենքով, քանի որ արդեն Հանրապետության նախագահի կողմից սույն թվականի սեպտեմբերի 25-ի հրամանագրով սահմանվել է կառավարության և պետական կառավարման այլ մարմինների կառուցվածքն, ապա անհրաժեշտություն է առաջացել վերոնշյալ օրենքն ուժը կորցրած ճանաչել»,-ասել է Ա. Լազարյանը:
Իր հերթին, ԱԺ պետական իրավական հարցերի մշտական հանձնաժողովի նախագահ Հովիկ Ջիվանյանը նշել է, որ օրենքի նախագիծը քննարկման է դրվել հանձնաժողովում և տրվել է դրական եզրակացություն:
Պատգամավորների քվերակության արդյունքում որոշումն ընդունվել է:
ԱԺ նիստում միաձայն ընդունվել է «Դատական ակտերի հարկադիր կատարման մասին» ԼՂՀ օրենքում լրացումներ կատարելու մասին և «Հրապարակային սակարկությունների մասին ԼՂՀ օրենքում փոփոխություններ կատարելու մասին» ԱՀ օրենքների նախագծերի փաթեթը, որը ներկայացրել է ԱՀ արդարադատության նախարար Արարատ Դանիելյանը:
«Նախագծով առաջարկվող լրացումները նպատակ են հետապնդում ընդլայնել պարտապան ֆիզիկական անձանց տրամադրվող սոցիալական երաշխիքների շրջանակը և պարտապանին հնարավորություն տալ իր գույքի վրա բռնագանձում տարածվելու դեպքում չզրկվել նվազագույն բնակապահովումից»,-մասնավորապես ասել է Ա. Դանիելյանը:
ԱԺ պետական իրավական հարցերի մշտական հանձնաժողովի նախագահ Հովիկ Ջիվանյանը նշել է, որ այս օրենքի նախագիծը ևս քննարկման է դրվել հանձնաժողովում և տրվել է դրական եզրակացություն:
Իսկ ԱՀ ֆինանսների նախարար Գրիգորի Մարտիրոսյանն էլ ներկայացրել է «Լիցենզավորման մասին» Լեռնային Ղարաբաղի Հանրապետության օրենքում լրացումներ և փոփոխություններ կատարելու մասին» և «Պետական տուրքի մասին» Լեռնային Ղարաբաղի Հանրապետության օրենքում փոփոխություններ կատարելու մասին» Արցախի Հանրապետության օրենքների նախագծերի փաթեթը:
Գ. Մարտիրոսյանը նշել է, որ օրինագծերի փաթեթի ընդունումը պայմանավորված է խաղողի օղու արտադրությունը խթանելու անհրաժեշտությամբ, ինչպես նաև ուղղված է լիցենզավորման ոլորտի պետական կարգավորման արդյունավետության բարձրացմանը, գործող նորմատիվ իրավական ակտերի կատարելագործմանը:
«Ոգելից խմիչքներն արտահանվող այն ապրանքատեսակներից են, որի արտադրությունն ունի զարգացման մեծ ներուժ: Այդ պատճառով իրականացվող արտահանման ուղղված քաղաքականության շրջանակներում անհրաժեշտություն է առաջացել բարելավել ոլորտը կանոնակարգող օրենսդրությունում: Օրինագծերի շրջանակում ճշտվել են մասնագիտական որակավորմանը վերաբերող պահանջները, հստակեցվել են լիցենզավորման կարգերի ընդունման հետ կապված դրույթները, կատարվել են խմբագրական բնույթի աշխատանքներ»,-ասել է Գ. Մարտիրոսյանը:
ԱԺ ֆինանսաբյուջետային և տնտեսական կառավարման հարցերի մշտական հանձնաժողովի նախագահ Ռուսլան Իսրայելյանն էլ ասել է, որ օրենքի նախագիծը քննարկման է դրվել հանձնաժողովում և տրվել դրական եզրակացություն: Պատգամավորների քվեարկությամբ այն ևս ընդունվել է:
ԱՀ 6-րդ գումարման ԱԺ 6-րդ նստաշրջանի լիագումար նիստին պատգամավորական հայտարարությամբ հանդես են եկել պատգամավորներ Հայկ Խանումյանը և Ռոմելա Դադայանը:
Նիստի վերջում Ա. Ղուլյանը հայտարարել է Արցախի և Հայաստանի միջև նախատեսված միջխորհրդարանական նիստի նախապատրաստության մասին, որը տեղի է ունենալու նոյեմբերին Երևանում: