ՀՀ «Գրինդեքս» դեղագործական ընկերության և Հայկական բժշկական ասոցացիայի նախաձեռնությամբ Ստեփանակերտի հանրապետական բժշկական կենտրոնում տեղի է ունեցել «Մետաբոլիկ թերապիայի ժամանակակից տենդենցները» թեմայով դասախոսություն, որը վարում էին ՀՀ-ից ժամանած բժիշկները։
Ստեփանակերտում տեղի է ունեցել «Մետաբոլիկ թերապիայի ժամանակակից տենդենցները» թեմայով դասախոսություն
ՍՏԵՓԱՆԱԿԵՐՏ, 18 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում ՀՀ «Կանխարգելիչ սրտաբանության կենտրոն»-ի ղեկավար, սրտաբան, բժշկական գիտությունների դոկտոր, պրոֆեսոր Պարունակ Զելվեյանն ասել է, որ սա իրենց հերթական այցն է Արցախ։
«Այստեղ ենք, որպեսզի մեր գիտելիքներով, փորձով ու բժշկության ոլորտի վերջին նորություններով կիսվենք Արցախի մեր գործընկերների հետ։ Դասախոսության ժամանակ քննարկել ենք մարդու սիրտ-անոթային հիվանդությունների բուժման ժամանակակից մոտեցումները, որոնք կարելի է կանխել՝ կիրառելով միջազգային չափանիշներին համապատասխան միջոցներ»,-մասնավորապես ասել է սրտաբանը և կարևորել այն հանգամանքը, որ դասախոսության մասնակիցները տեղում ստանալու են շարունակական մասնագիտական զարգացման (ՇՄԶ) կրեդիտներ։
Իսկ Երևանի «Էրեբունի» բժշկական կենտրոնի կարդիոպուլմոնոլոգիայի բաժանմունքի ղեկավար Լաուրա Աթայանն էլ ասել է, որ այս անգամ Արցախ են այցելել, որպեսզի տեղի մասնագետներին ներկայացնեն մետաբոլիկ (նյութափոխանակության խանգարում) դեղամիջոցներ, որոնք օգտագործվում են սրտային և նյարդային համակարգերի, ինչպես նաև թոքերի հիվանդությունների ժամանակ։
Դասախոսությանը ներկա էին ԱՀ առողջապահության նախարար Կարինե Աթայանը, Ստեփանակերտի և շրջանների բուժմիավորումների սրտաբաններ, նյարդաբաններ, թերապևտներ և այլ մասնագետներ։