Լոս Անջելեսում այսօր՝ նոյեմբերի 23-ին՝ ժամը 22:00-ից մեկնարկած «Հայաստան» համահայկական հիմնադրամի Հեռուստամարաթոնին տեսաուղերձով հանդես է եկել ԱՀ Նախագահ Բակո Սահակյանը:
Մեր բոլոր հաղթանակների ու ձեռքբերումների հիմքում ընկած է Հայաստան-Արցախ-Սփյուռք կուռ եռամիասնությունը. Բակո Սահակյան
ՍՏԵՓԱՆԱԿԵՐՏ, 23 նոյեմբերի, ԱՐՑԱԽՊՐԵՍ: Նախագահն իր խոսքում, դիմելով համայն հայությանը, մասնավորապես նշել է, որ կրկին միասնական ջանքերով պետք է մեկնարկ տանք Արցախի համար ռազմավարական կարևոր նշանակություն ունեցող ծրագրերին՝ ուղղված խորքային հորերի հորատմանը, ոռոգման ցանցերի կառուցմանը և արևային էներգիայի համակարգերի ներդրմանը:
«Դրանց հաջող ու արդյունավետ իրականացման արդյունքում նոր որակ կհաղորդվի մեր երկրի սոցիալ-տնտեսական զարգացմանը և հանրապետության անվտանգության ամրապնդմանը: Ժամանակակից ոռոգման համակարգ ունենալը հնարավորություն կտա նշանակալիորեն ավելացնել գյուղատնտեսական ապրանքների արտադրությունը, ավելի խնայողաբար օգտագործել ջրային և հողային ռեսուրսները, կնպաստի գյուղական բնակչության բարեկեցության մակարդակի բարձրացմանը՝ մշտական ու երաշխավորված աշխատատեղեր ստեղծելով շրջաններում»,- ասել է Բ. Սահակյանը և ավելացրել, որ այն թույլ կտա ապահովել պարենային անվտանգության բարձր մակարդակ, մեծացնել և ընդլայնել Արցախից արտահանվող ապրանքների ծավալն ու տեսականին:
Հանրապետության նախագահն անդրադարձել է նաև արևային էներգիայի ներդրման ծրագրին՝ շեշտելով որ այն նոր ուղղություն է Արցախի համար, որը, բնականաբար, որևէ վտանգ չի ներկայացնում բնությանն ու շրջակա միջավայրին. ունի տնտեսական առավելություններ՝ էներգիայի ավանդական տեսակների համեմատ, և կարևոր դերակատարություն՝ էներգետիկ անվտանգության տեսանկյունից:
Բ. Սահակյանի խոսքով՝ մեր բոլոր հաղթանակների ու ձեռքբերումների հիմքում ընկած է Հայաստան-Արցախ-Սփյուռք կուռ եռամիասնությունը և յուրաքանչյուրը պետք է ամեն ինչ անի՝ այն էլ ավելի ամրապնդելու համար:
««Հայաստան» համահայկական հիմնադրամի կողմից կազմակերպվող ամենամյա հեռուստամարաթոնները մեր համազգային ներուժը կոնկրետ ծրագրերի ուղղելու կարևոր հարթակներից են, որոնք իրենց արդյունավետությունն ապացուցում են արդեն քառորդ դար: Համոզված եմ, որ այս անգամ ևս մենք կցուցաբերենք միասնականություն ու պատրաստակամություն համատեղ ջանքերով Արցախը շենացնելու և զորացնելու գործում: Արցախի ժողովրդի, իշխանությունների և անձամբ իմ անունից շնորհակալություն եմ հայտնում բոլորիդ՝ կարևոր այս միջոցառմանը մասնակցելու համար: Աշխարհասփյուռ հայությանը մաղթում եմ խաղաղություն, բարեկեցություն, նորանոր հաջողություններ ու ամենայն բարիք»,- նշել է Բ. Սահակյանը:
