ԱՄՆ նախագահ Դոնալդ Թրամփը Երուսաղեմը պաշտոնապես ճանաչել է՝ որպես Իսրայելի մայրաքաղաք: Իսլամական աշխարհի որոշ առաջնորդներ, այդ թվում՝ Թուրքիայի նախագահ Ռեջեփ Թայիփ Էրդողանը, նշել են, որ, Երուսաղեմի ճանաչման դեպքում, հակազդեցության են գնալու, որը տարածաշրջանում կարող է լինել նոր հակամարտության սկիզբ:
Ի՞նչ հետևանքներ կունենա Երուսաղեմը որպես Իսրայելի մայրաքաղաք ճանաչելը. մեկնաբանում են Արցախի խորհրդարանականները
ՍՏԵՓԱՆԱԿԵՐՏ, 7 դեկտեմբերի, ԱՐՑԱԽՊՐԵՍ: Այս հարցերի շուրջ «Արցախպրես»-ը զրուցել է ԱԺ խմբակցությունների ներկայացուցիչների հետ:
Հարցի վերաբերյալ «Հայրենիք» խմբակցության ղեկավար Արթուր Թովմասյանը նշել է, որ Թրամփը աշխարհի հզոր երկրներից մեկի նախագահն է, և նրա այս հայտարարությունը կարևոր նախադեպ կարող է դառնալ:
«Այն, որ Թուրքիայի և Իսրայելի հարաբերություններն այդքան էլ լավ չեն, դա ակնհայտ է, և, այսօրինակ հարցերն օգտագործելով, նրա կողմից փորձ է արվելու խնդրին ներգրավել նաև մուսուլմանական աշխարհին, քանի որ գաղտնիք չէ, որ Թուրքիան վաղուց փորձում է իսլամադավան երկրների շրջանում առաջնորդի դեր ստանձնել: Բնականաբար, պատմական իրողությունները Թուրքիայի համար որևէ նշանակություն չունեն, և գոնե մեզ՝ հայերիս համար դրանում համոզվելու որևէ պատճառ չկա»,- ասել է Ա. Թովմասյանը և ավելացրել, որ եթե Իսրայելի դեպքում Երուսաղեմի և Արցախի պարագայում Շուշիի հարցը տեղափոխում ենք պատմաիրավական դաշտ, ապա Թուրքիան և Ադրբեջանն այստեղ ոչ մի ասելիք չունեն:
Մեր զրուցակցի խոսքով՝ երևույթը, իսկապես, աննախադեպ է, և պետք է սպասել իրադարձությունների զարգացման ընթացքին:
«Դաշնակցություն» խմբակցության պատգամավոր Վահրամ Բալայանը նշել է, որ այդ հարցերը, որոնք իրենց մեջ հակամարտություն են պարունակում, պետք է լուծել փոխըմբռնման բանակցային հարցերով: «Չեմ կարծում, որ սա հակամարտության առիթ կարող է դառնալ, քանի որ Թուրքիան հայտարարություններից այն կողմ չի անցնի»,- ասել է Վ. Բալայանը:
«Ժողովրդավարություն» խմբակցության ղեկավար Վարդգես Բաղրյանը նշել է, որ դեռևս հարց է՝ արդյո՞ք ԱՄՆ նախագահը կարող է միանձնյա որոշում կայացնել: Աժ պատգամավորի խոսքով՝ այդ հայտարարությունը միանշանակ չի ընդունվել, բայց, թերևս, եթե չասենք դեմ, ապա զգուշավոր կարծիքներ հնչեցին այս առումով, և հնարավոր է, որ սա սկիզբ դնի նոր հակամարտության:
«Առանց այն էլ Մերձավոր Արևելքում կան չկարգավորված հարցեր, և միանգամից կայացնել ինչ-որ «կացնային» որոշում և մի հարվածով փորձել հարթեցնել, արդարացված չէ: Կարծում եմ՝ խնդիրը պետք է լուծվեր բանակցությունների ճանապարհով, և, առհասարակ, որևէ մեկը իր վրա նման պատասխանատվություն չպետք է վերցնի: Այս առումով իրողությունը կարելի է համեմատել ղարաբաղյան հիմնախնդրի հետ, քանի որ մեր հարցի հետ կապված ևս կոնկրետ ինչ-որ մեկը չի կարող իր վրա վերցնել պատասխանատվություն և գրչի մի հարվածով որոշում կայացնել»,- ասել է Վ. Բաղրյանը և ավելացրել, որ չի բացառվում, որ այն կարող է այդ տարածաշրջանում նոր հակամարտություն առաջացնել:
Աժ «Շարժում 88» խմբակցության ղեկավար Էդուարդ Աղաբեկյանն էլ նշել է, որ Երուսաղեմը դեռևս ստեղծման օրվանից եղել է Իսրայելի մայրաքաղաքը, և այլ խնդիր է, որ ամերիկյան տարբեր նախագահներ ունեցել են տարբեր դիրքորոշումներ:
«Սա կարող է նաև լինել մեծ խաղի սկիզբ, արաբական գարնան երկրորդ ալիք: Այս քայլը միանշանակ կարող է տարածաշրջանում նոր հակամարտության սկիզբ դնել»,- ավելացրել է Է. Աղաբեկյանը:
Հարցի կապակցությամբ «Ազգային Վերածնունդ» խմբակցության ղեկավար Հայկ Խանումյանը նշել է, որ առայժմ զերծ կմնա կարծիք հայտնելուց:
