ԵԽԽՎ ձմեռային նստաշրջանից առաջ Ալիևի վարչակազմը փորձում է իր պատվիրակության կազմում կոսմետիկ փոփոխություն կատարել՝ բացառելով այն անդամներին, ում անունն ուղղակիորեն շաղկապված է այս պահին էլ Միլանի դատախազությունում քննվող գործի՝ «Ադրբեջանական լվացքատուն» սկանդալային էպոպեայի հետ։
ԵԽԽՎ ձմեռային նստաշրջանից առաջ Ադրբեջանը փորձում է կոսմետիկ փոփոխություն կատարել. Նաիրա Զոհրաբյան
ՍՏԵՓԱՆԱԿԵՐՏ, 8 հունվարի, ԱՐՑԱԽՊՐԵՍ: Panorama.am-ի թղթակցի հետ զրույցում նման համոզմունք հայտնեց ԵԽԽՎ-ում հայաստանյան պատվիրակության անդամ Նաիրա Զոհրաբյանը՝ հավելելով, որ Ադրբեջանը նման կերպ ձգտում է խուսափել հնարավոր մեծ աղմուկից։
Հիշեցնենք, որ ադրբեջանական պատվիրակության կազմից հեռացվել են պատգամավորներ Էլխան Սուլեյմանովը, Մուսլիմ Մամեդովը և Էլշան Մուսաևը: Նրանց փոխարինել են Ուլվիա Աղաևան, Էլշադ Հասանովը և Ասիմ Մոլլազադեն:
«Այս գործով, ինչպես հայտնի է, անցնում է ԵԽԽՎ նախկին փոխնախագահ Լուկա Վոլոնտեն։ Նա իր խոստովանական ցուցմունքներում նշել է Էլխան Սուլեյմանովի և ադրբեջանական պատվիրակության մի քանի անդամների անուններ, որոնք իրեն և ԵԽԽՎ այլ պատգամավորների կաշառել են։ Մասնավորապես, Էլխան Սուլեյմանովի անունը մի քանի դրվագներով շոշափվել է որպես ադրբեջանական պատվիրակության անդամ, որի վրա դրված է եվրոպացի պատգամավորներին կաշառելու գործառույթը»,- ասաց Նաիրա Զոհրաբյանը։
ԵԽԽՎ-ում հայաստանյան պատվիրակության անդամի խոսքով, իր համար բացարձակապես տարբերություն չկա, որ այդ կառույցում ադրբեջանական պատվիրակությունում անդամների փոփոխություն է տեղի ունեցել։ Առավել կարևոր է այն, որ Ադրբեջանի քաղաքականությունը չի փոխվել, և նույնիսկ ԵԽԽՎ պատվիրակության նոր անդամները, որպես խամաճիկ, շարունակելու են իրականացնել ադրբեջանական ղեկավարության քաղաքականությունը։
Անդրադառնալով հունվարի 22-ին մեկնարկելիք ԵԽԽՎ ձմեռային նստաշրջանի աշխատանքներին՝ Նաիրա Զոհրաբյանը նշեց, որ Հայաստանի համար նստաշրջանը կարևորվում է հատկապես ՀՀ նախագահի սպասվելիք ելույթով, որին պետք է հաջորդի ԵԽԽՎ պատգամավորների հետ հարցուպատասխանը։
«Այնուհետև տեղի կունենա ԵԽԽՎ նախագահի ընտրություն։ Ըստ քաղաքական պայմանավորվածության՝ նախագահի թեկնածու կներկայացնի սոցիալիստների խումբը։ Նրանք արդեն իսկ կատարել են իրենց ընտրությունը, ԵԽԽՎ նախագահի թեկնածուն Միքելե Նիկոլետտին է։ Նաև լրացել է Եվրոպայի խորհրդի մարդու իրավունքների հանձնակատարի պաշտոնավարման ժամկետը։ Ներկայացված են թեկնածուներ, որոնցից մենք փակ-գաղտնի քվեարկությամբ կընտրենք հանձնակատարին։
Բացի այդ՝ կան նաև մի քանի զեկույցներ, որտեղ հայկական պատվիրակությունը լուրջ անելիքներ ունի։ Գրեթե ամենօրյա ռեժիմով քննարկում ենք ձմեռային նստաշրջանում հայկական պատվիրակության անելիքները։ Ընդհանուր առմամբ, հունվարին բավականին հետաքրքիր նստաշրջան է սպասվում»,- նշեց ԵԽԽՎ-ում հայկական պատվիրակության անդամը։
Վերջում Նաիրա Զոհրաբյանը տեղեկացրեց, որ ԵԽ նախարարների կոմիտեն բավականին լուրջ քննարկում է սկսել ՄԻԵԴ-ում Ադրբեջանի կողմից իր պարտավորությունների չկատարման առնչությամբ։
«Կարծում եմ, որ այս խնդիրը քննարկման առարկա կդառնա ԵԽԽՎ իրավական հանձնաժողովում։ Ադրբեջանը միակ երկիրն է, որ հրաժարվել է կատարել Եվրոպական դատարանի վճիռը, այն է՝ ազատ արձակել քաղբանտարկյալ Իլգար Մամեդովին»,- ամփոփեց խորհրդարանականը։
