Այսօր՝ հունվարի 22-ին, Ստեփանակերտում տեղի է ունեցել Արցախի կոմունիստական կուսակցության առաջին քարտուղար Հրանտ Մելքումյանին վերջին հրաժեշտի արարողությունը:
Ազնիվ ու սկզբունքային. գործընկերների բնորոշումը Հրանտ Մելքումյանի մասին
ՍՏԵՓԱՆԱԿԵՐՏ, 22 հունվարի, ԱՐՑԱԽՊՐԵՍ: «Արցախպրես»-ի թղթակցի հետ զրույցում հասարակական-քաղաքական գործչի կյանքի և քաղաքական գործունեության մասին իրենց հուշերն ու կարծիքներն են հայտնել խորհրդարանական և արտախորհրդարանական քաղաքական ուժերի ներկայացուցիչները:
ԱԺ «Հայրենիք» խմբակցության ղեկավար Արթուր Թովմասյանն ասել է, որ Հ. Մելքումյանի մահը ոչ միայն Արցախի, այլև ամբողջ հայության համար ծանր կորուստ էր:
«Նրա հետ ծանոթ էի ոչ միայն քաղաքական, այլև մասնագիտական դաշտից. երկուսս էլ զբաղվել ենք ճշգրիտ գիտությամբ՝ մեխանիկայի բնագավառում: Լինելով կոմունիստ և կոմունիստական կուսակցության առաջնորդ՝ նա փայլուն կատարում էր իր առջև դրված խնդիրները»,- նշել է Ա. Թովմասյանը և ավելացրել, որ կոմունիստական կուսակցության առաջնորդը ջերմ հարաբերություններ ուներ նաև մյուս քաղաքական ուժերի ներկայացուցիչների հետ՝ օրինակ՝ դաշնակցական ընկերներին դիմում էր «սիրելի դաշնակցականներ» անվամբ:
ԱԺ «Դաշնակցություն» խմբակցության պատգամավոր, ԱԺ փոխխոսնակ Վահրամ Բալայանն էլ ասել է, որ Հ. Մելքումյանը բեղմնավոր գործունեություն է ծավալել թե՛ խորհրդային և թե՛ հետխորհրդային ժամանակաշրջանում:
«Նա ազնիվ էր կուսակցության նկատմամբ և մինչև վերջ մնաց՝ որպես կոմունիստական կուսակցության հավատավոր անդամ: Եթե շատերը հետխորհրդային ժամանակահատվածում փոխեցին իրենց քաղաքական հայացքները, նա մնաց հավատարիմ իր ընտրած գաղափարախոսությանը մինչև իր կյանքի վերջը, և փորձեց անել ամեն ինչ, որպեսզի կոմունիստական կուսակցությունը շարունակի գործել Արցախի տարածքում:
Նման մարդիկ անհրաժեշտ են մեր կյանքում, և ցավում ենք, որ նա անժամանակ կյանքից հեռացավ: Մենք բավականին մտերիմ ենք եղել իրար հետ՝ չնայած տարբեր կուսակցություններ էինք ներկայացնում: Եվ ամեն անգամ, երբ հանդիպում էինք, առավել շատ խոսում էր ոչ միայն իր անձնական կյանքից, այլև երկրին հուզող, մտահագող հարցերի շուրջ»,- նշել է Վ. Բալայանը և ավելացրել, որ Հ. Մելքումյանը փորձում էր իր ուժերի ներածին չափով մասնակցություն ունենալ պետականաշինությանը, երկրի հետ կապված խնդիրների լուծմանը, ինչպես նաև իր մոտեցումները վարակիչ դարձնել շրջապատի համար:
ԱԺ «Ժողովրդավարություն» խմբակցության ղեկավար Վարդգես Բաղրյանն էլ ասել է, որ հասարակական-քաղաքական գործչին ճանաչում է վաղուց, և նա մեծ հեղինակություն էր վայելում Արցախում:
«Այսօր նրա հուղարկավորությանը հոծ բազմությունը հավաքվել էր վերջին հրաժեշտը տալու: Ընդգծեմ նրա սկզբունքային լինելը: Նա մինչև վերջ հավատարիմ մնաց իր քաղաքական հայացքներին կոմունիստական կուսակցության շարքերում և, երկար տարիներ լինելով Արցախի կոմունիստական կուսակցության ղեկավար, այդպես էլ չդավաճանեց իր սկզբունքներին: Անկասկած, նա միշտ ասում էր այն, ինչ մտածում էր և մտածում էր երկրի վաղվա օրվա մասին»,- նշել է Վ. Բաղրյանը և ավելացրել, որ Հ. Մելքումյանի պատկերացումներն անկաշկանդ էին. մենք կորցրինք մեր երկրի լավագույն զավակներից մեկին:
ԱԺ «Շարժում-88» խմբակցության ղեկավար Էդուարդ Աղաբեկյանն էլ ասել է, որ միայն դրականը կարելի է խոսել նրա մասին: «Համեստ, հասարակ մարդ, լավ մասնագետ, այդպես կարելի է բնորոշել նրան: Սովորաբար լատինական ասացվածքն ասում է՝ մահացածների մասին խոսում են կամ լավ, կամ ոչինչ չեն ասում, բայց դա Հրանտ Մելքումյան անունով մարդու մասին չէ»,- նշել է Է. Աղաբեկյանը և ավելացրել, որ Հ. Մելքումյանն ուներ սեփական խոսք, յուրահատուկ մտածելակերպ և կարողանում էր իր խոսքը միշտ հիմնավորել:
Արտախորհրդարանական «Արցախի հանրապետական կուսակցություն» քաղաքական ուժի համանախագահ, «Հելսինկյան նախաձեռնություն-92»-ի ԼՂՀ կոմիտեի համակարգող, արցախցի իրավապաշտպան Կարեն Օհանջանյանն էլ ասել է, որ նա մարդ էր, ով փորձեց ամեն ինչ անել Արցախի ազգային-ազատագրական շարժման գործում:
«Նա մեծ դեր է ունեցել Արցախի Հանրապետության պատմության մեջ: Ես պետք է նշեմ, որ մեծ է եղել նրա ներդրումը Արցախի քաղաքական կյանքում, այդ թվում՝ ճանաչման գործում: Նա եղել է շատ ազնիվ և էներգիայով լի անձնավորություն»,- նշել է Կ. Օհանջանյանը և ավելացրել, որ նրա հիշատակը միշտ վառ է մնալու բոլորի սրտերում:
Իսկ ԱԺ «Վերածնունդ» խմբակցության ղեկավար Հայկ Խանումյանն էլ ասել է, որ Հ. Մելքումյանին հինգ տարի է, ինչ ճանաչում է:
«Մեկ դրվագ կուզեի պատմել: Մի քանի տարի առաջ, երբ Ստեփանակերտում ներքաղաքային տրանսպորտի վճարի թանկացման հետ կապված կազմակերպել էինք բողոքի միջոցառումներ, Հրանտ Մելքումյանը միակն էր, որ պրոֆեսիոնալ հաշվարկ էր կատարել երթուղայինների ծախսերի հետ կապված՝ ճշտելով դրանց մակնիշը, շարժիչի հզորությունը, երթուղու երկարությունը, ծախսվող վառելիքի չափը և այլն: Կարծում եմ, որ շատ հարցերի վերաբերյալ հենց նման պրոֆեսիոնալ մոտեցում ուներ: Ցավակցում եմ հարազատներին և մտերիմներին»,- իր խոսքում նշել է Հ. Խանումյանը: