ՀՀ ֆինանսների նախարարությունը անձնակազմի մասնագիտական կարողությունների զարգացման ոլորտում աջակցություն կցուցաբերի Արցախի Հանրապետության ֆինանսների նախարարությանը:
Արցախի և Հայաստանի ֆինանսների նախարարություններն ընդլայնում են համագործակցության շրջանակները
ՍՏԵՓԱՆԱԿԵՐՏ, փետրվարի 12, ԱՐՑԱԽՊՐԵՍ: Փետրվարի 12-ին Երևանում կայացած հանդիպմանը ԱՀ ֆինանսների նախարար Գրիգորի Մարտիրոսյանը և ՀՀ ֆինանսների նախարար Վարդան Արամյանը քննարկել են այս և այլ ոլորտներում համագործակցության հեռանկարները:
«Երկու կառույցների միջև համագործակցությունը միշտ շատ բարձր մակարդակ է ունեցել: ՀՀ ֆինանսների նախարարի հետ քննարկել ենք հիմնականում անձնակազմի մասնագիտական վերապատրաստման հետ կապված հարցեր և այն օժանդակությունը, որ նախարարությունը կարող է մեզ ցուցաբերել մասնագիտական կարողությունների զարգացման ոլորտում: Խոսել ենք նաև տեղեկատվական տեխնոլոգիաների ոլորտում համագործակցության և աջակցության եղանակներից»,- «Արցախպրես»-ի փոխանցմամբ հանդիպումից հետո ասել Գ. Մարտիրոսյանը:
Հանդիպմանը քննարկվել են նաև պետական ֆինանսների կառավարման տեղեկատվական համակարգում այն աշխատանքները, որոնք նախաձեռնել է ՀՀ ֆինանասների նախարարությունը և հեռանկարները՝ Արցախում այն ևս ներդրելու համար: Նախարարները խոսել են նաև համագործակցության այլ ուղղությունների՝ պետական գնումների, աուդիտի, ֆինանասական վերահսկողության և այլ ոլորտների մասին:
«Ոլորտում անելիքներն անսահման են: ՀՀ ֆինանսների նախարարությունն անընդհատ բարեփոխումներ է իրականացնում բոլոր ոլորտներում, և մենք էլ փորձում ենք հետ չմնալ դրանցից: Մենք անընդհատ պետք է աշխատենք տեղյակ լինել նորություններին և դրանք ներդնել նաև Արցախում»,- նշեց ԱՀ ֆինանսների նախարար Գրիգորի Մարտիրոսյանն ու հույս հայտնեց, որ այս այցը կընդլայնի համագործակցությունը:
