«Արցախհէկ» բաց բաժնետիրական ընկերությունը 2017թ.-ին արտադրել է 181 մլն կՎտ/ժ էլեկտրաէներգիա:
Ի ՞նչ արդյունքներ ու ծրագրեր ունի «Արցախհէկ»-ը. ընկերության գլխավոր տնօրենը պատմել է ամենագլխավորի մասին
ՍՏԵՓԱՆԱԿԵՐՏ, փետրվարի 15, ԱՐՑԱԽՊՐԵՍ: Այս մասին «Արցախպրես»-ի հետ զրույցում ասել է «Արցախհէկ» ԲԲ ընկերության գլխավոր տնօրեն Վահրամ Բեգլարյանը՝ հավելելով, որ առանց հարկային մասհանումների անցած տարվա ընթացքում ընկերության ունեցած շահույթը կազմել է 1 մլրդ 800մլն դրամ:Մեր զրուցակցի խոսքով՝ Ընկերության արտադրական հզորությունը ներկայումս կազմում է 71.7 ՄգՎ, որն ընթացիկ տարում կավելանա 7.8ՄգՎ-ով՝ կազմելով 79.5 ՄգՎ:
«Այս տարվա ընթացքում շահագործման կհանձնենք ևս երկու հէկ՝ «Լև-1»-ը և «Թրղե-4»-ը՝ «Արցախհէկ» ընկերության կազմում ընդգրկված հէկերի քանակը հասցնելով 8-ի: Իսկ մոտ ապագայում նախատեսում ենք սկսել ևս մեկ՝ «Թարթառ-1» հէկ-ի կառուցման աշխատանքները, որի շահագործման արդյունքում ունեցած արտադրական հզորությունը կավելանա շուրջ 10 ՄգՎ-ով և 60մլն կՎտ էլեկտրաէներգիայի լրացուցիչ արտադրության հնարավորությամբ»,- ասել է Վ. Բեգլարյանը:
Բացի հիդրոէներգետիկայից, գլխավոր տնօրենի խոսքով՝ ծրագրում են հիմնել ֆոտովոլտային կայան արևային էներգիայի ստացման նպատակով: «Հաշվի առնելով Արցախում արևային էներգիայի զարգացման քաղաքականությունը՝ շատ առարկայական քննարկում ենք առաջիկայում ներդրումներ անել այդ ոլորտում: Կոնկրետ ծրագրի մասին կհայտարարենք ավելի ուշ, երբ դրա վերաբերյալ վերջնական որոշում լինի»,- ասել է մեր զրուցակիցը:
Խոսելով ընկերության նկատմամբ շարունակաբար աճող հետաքրքրության մասին՝ Վ. Բեգլարյանը նշել է, որ «Արցախհէկ»-ը արցախյան այն եզակի ընկերություններից է, որտեղ արտասահմանյան կապիտալը մեծ տեղ է զբաղեցնում: «Եթե ընկերության ստեղծման պահին՝ 2007թ.-ին, պետությունը ունեցել է 100 տոկոս բաժնեմաս, ապա այսօր արդեն կարող ենք արձանագրել, որ պետական մասնակցությունը կազմում է 10.33 տոկոս: Հիմնական ներգրավված մասնավոր միջոցներն արտասահմանից են, որոնց մի մեծ մասը օտարազգի, հիմնականում եվրոպացի, ներդրողներ են: Կարծում եմ՝ սա շատ կարևոր ցուցիչ է, քանի որ այլազգիների մասնակցությունը Արցախում բիզնես-ինդուստրիայի զարգացմանը վկայում է այն մասին, որ մեր երկիրը ունի բարենպաստ բիզնես միջավայր, որտեղ կայուն և կանխատեսելի արդյունք կարելի է ապահովել»,- նշել է «Արցախհէկ»-ի գլխավոր տնօրենը:
Բաժնետոմսերի թողարկման արդյունքում Ընկերության կանոնադրական կապիտալը 5 մլրդ 100մլն դրամից հասցվել է 10մլրդ 650 մլն-ի: Ընկերության ֆինանսական ծախսերը ամեն տարի ստուգվում է միջազգային որոկավորում ունեցող անկախ աուդիտորական կազմակերպության կողմից: «Արցախհէկ»-ն ունի 1200 բաժնետեր, ովքեր տարեկան ժողովի ընթացքում ծանոթանում են ֆինանսական հաշվետվությանը, ինչպես նաև ընտրում են 7 հոգուց բաղկացած տնօրենների խորհուրդ, որը փաստացի կառավարում է ընկերության ողջ գործունեությունը: Տնօրենների խորհուդն է նշանակում նաև ընկերության գլխավոր տնօրենին:
«Բաժնետոմսերի դիմաց ընկերությունը բաժնետերերին ներկայումս վճարում է տարեկան 10 տոկոս շահաբաժին, որը հետագայում աճելու միտում ունի, քանի որ անցած տասը տարիների ընթացքում նոր հէկերի կառուցման նպատակով ստացված միջոցները հիմնականում ուղղվել են ներդրումային ծրագրերին: Ակտիվ ներդրումային ծրագրերը, ինչպես արդեն նշեցի, այսօր էլ շարունակվում են, և հետագայում, այդ ծախսերի հետգնմանը զուգահեռ, կավելանա նաև բաժնետերերի ստացած շահութաբաժնի չափը»,- ասել է Վ. Բեգլարյանը և ավելացրել, որ մեկ բաժնետոմսի արժեքը ներկայումս կազմում է 1150 դրամ, և այն ձեռքբերելու համար ցանկացողները կարող են գնել Nasdaq OMX Armenia ֆոնդային բորսայում, որտեղ ամեն օր շուրջ 6 մլն դրամի բաժնետոմս է շրջանառվում:
Վ. Բեգլարյանը նշեց նաև, որ անցած տասը տարիների ընթացքում մոտ 100 աշխատողից ընկերության աշխատակիցների թիվը ներկայումս անցել է 200-ը, իսկ միջին աշխատավարձը 83 հազարից դարձել է 218 հազար ՀՀ դրամ: Միայն 2015-17թթ.-ին ընկերության կողմից պետական բյուջե մուտքագրված հարկերը կազմել են ավելի քան 2 մլրդ 300 մլն դրամ: Այս առումով «Արցախհէկ»-ը համարվում է Արցախի ամենախոշոր հարկատուներից մեկը և վերջին մի քանի տարիների ընթացքում մշտապես գտնվում է առաջին տասնյակում: