Մի քանի օր անց շախմատասերի ուշադրությունը կբևեռվի դեպի Գերմանիայի մայրաքաղաք Բեռլին, որտեղ կկայանա շախմատի աշխարհի չեմպիոնի հավակնորդների մրցաշարը:

27 փետրվարի, 2018, 10:42

«Շախմատային թագի հետևից». Հավակնորդների մրցաշարի ֆավորիտը բազմափորձ Լևոն Արոնյանն է. Սերգեյ Կարյակին

ՍՏԵՓԱՆԱԿԵՐՏ, փետրվարի 27, ԱՐՑԱԽՊՐԵՍ-ԱՐՄԵՆՊՐԵՍ: Այս անգամ մրցաշարը բավականին լուրջ կազմ է հավաքել: 8 մասնակիցների շարքում է նաև Ռուսաստանի երեք ներկայացուցիչներից մեկը` Սերգեյ Կարյակինը: Նա հավակնորդների մրցաշարից առաջ պատասխանել է «Արմենպրես»-ի հարցերին:

-Ի՞նչ սպասելիքներ ունեք հավակնորդների մրցաշարից:

-Ինչպիսին կարող են լինել սպասելիքները մի գրոսմայստերի մոտ, ով արդեն մեկ անգամ հաղթել է Հավակնորդների մրցաշարում: Իհարկե, ես ուզում եմ հաջողության հասնել: Սակայն հաղթել հավակնորդների մրցաշարում երկու անգամ անընդմեջ կլինի շատ դժվար: Իմ 7 մրցակիցներից յուրաքանչյուրը կարող է տիրանալ աշխարհի չեմպիոնի մրցախաղի ուղեգրին:

-Ովքե՞ր են մրցաշարի հիմնական ֆավորիտները:

-Կարծում եմ հավակնորդների մրցաշարի ֆավորիտ բազմափորձ Լևոն Արոնյանն է: Նա շատ է ցանկանում հաղթել: Սա Լևոնի կյանքի երազանքն է: Նա բազմիցս խաղացել է հավակնորդների մրցաշարում և միշտ էլ մրցաշարի հիմնական ֆավորիտն էր: Հիշում եմ, որ նա վստահ գլխավորում էր Լոնդոնում կայացած հավակնորդների մրցաշարի մրցաշարային աղյուսակը: Սակայն երբեմն Լևոնի մոտ տեղի են տալիս նյարդերը: Գուցե դա նրանից է, որ մեծ պատասխանատվությամբ է մոտենում: Չեմ անտեսի նաև Մամեդյարովին, ով հրաշալի տարի անցկացրեց: Շատ բանի մասին է խոսում այն, որ Շախրիյարը հիմա ՖԻԴԵ-ի դասակարգման աղյուսակի երկրորդ համարն է:

-Ինչպիսի՞ նախապատրաստական փուլ եք անցնելու:

-Հավաքներ, հավաքներ և էլի հավաքներ: Իմ թիմում փոփոխություններ կան` այժմ համագործակցում եմ Ալեքսանդր Ռյազանցևի հետ: Նա հրաշալի մասնագետ է: Նա միացել է իմ թիմին: 

-Ինչպիսի՞ հակառակորդ է ձեզ համար Լևոն Արոնյանը:

-Մեր պարտիաները միշտ էլ անցնում են հետաքրքիր պայքարում: Առաջ Լևոնն ինձ հաճախ էր «հարվածում», սակայն հիմա ես նաև հակահարվածներ էլ եմ տալիս: Մենք հրաշալի պարտիա ունեցանք Լոնդոնի հավակնորդների մրցաշարում, որտեղ հաղթած դիրքում ես համաձայնեցի ոչ-ոքիի: Այնպես որ, Լևոնն ինձ պարտք է (ծիծաղում է):

Հարցազրույցը՝ Վարվառա Հայրապետյանի