Էստոնիայի հայ համայնքը, ի տարբերություն ադրբեջանական համայնքի մի քանի ներկայացուցիչների, շատ զուսպ, քաղաքավարի է իրեն դրսեւորում եւ չի խախտում երկրի օրենքները։
Էստոնիայի հայերն իրենց զուսպ են պահում՝ ի տարբերություն ադրբեջանցիների. Տալլինի պատվավոր քաղաքացի
ՍՏԵՓԱՆԱԿԵՐՏ, ապրիլի 13, ԱՐՑԱԽՊՐԵՍ: Այս մասին ապրիլի 13-ին տեղի ունեցած ուղիղ հեռարձակման ժամանակ լրագրողներին հայտնել է Էստոնիայի Ազգային փոքրամասնությունների ներկայացուցիչների պալատի ղեկավար, փիլիսոփայական գիտությունների դոկտոր, Տալլինի պատվավոր քաղաքացի Ռաֆիկ Գրիգորյանը, հայտնում է news.am-ը:
Նրա խոսքով՝ Ադրբեջանում իրականացվում է հայատյաց, եւ, ըստ էության, ակնհայտ ռասիստական քաղաքականություն։ Այս ամենը, ըստ Գրիգորյանի, անհետք չի անցնի Ադրբեջանի համար, քանի որ Ադրբեջանն էլ է բազմազգ հանրապետություն։
Բացի այդ, Գրիգորյանը նշել է, որ Բաքվի կողմից անցկացվող քաղաքականությունը, ցավոք, մասամբ արտացոլվում է ադրբեջանական սփյուռքում եւ հետխորհրդային տարածքում։
«Հայկական ընտանիքներում այլ քաղաքականություն է վարվում։ Մեզ մոտ ասում են՝ որքան լեզու գիտես, այնքան մարդ ես»,–շեշտել է նա։
Իր հերթին Տալլինի Հայկական մշակութային համայնքի նախագահ Ռազմիկ Իվանյանը հայտնել է, որ ադրբեջանական համայնքի ներկայացուցիչները մի անգամ փորձել են խոչընդոտել «Հայաստանի պատմական քարտեզները» ցուցահանդեսին, բայց հարցը հաջողվել է լուծել՝ չնայած ադրբեջանական սփյուռքի ներկայացուցիչների ագրեսիվ պահվածքին։
Պետք է նշել, որ այդ ցուցահանդեսում հավաքված էին հազվագյուտ քարտեզների կրկնօրինակներ, որոնց բնօրինակները պահվում են Ֆրանսիայի Ազգային գրադարանի, Բրիտանական գրադարանի եւ Բրիտանական թանգարանի, ԱՄՆ Կոնգրեսի գրադարանի, Բավարիայի պետական գրադարանի, Ջոն Ռայնոլդսի անվան գրադարանի, Վատիկանի գրադարանի, Մատենադարանի հին ձեռագրերի ինստիտուտի եւ բազմաթիվ այլ պահոցներում: