ԱՀ մշակույթի, երիտասարդության հարցերի և զբոսաշրջության նախարարության նախաձեռնությամբ Ստեփանակերտի մշակույթի և երիտասարդության պալատում կայացել է Արցախի ժողովրդական արտիստ Քաջիկ Հարությունյանի ծննդյան 70-ամյակին նվիրված հոբելյանական երեկո:
Ստեփանակերտում կայացել է Քաջիկ Հարությունյանի ծննդյան 70-ամյակին նվիրված միջոցառում
ՍՏԵՓԱՆԱԿԵՐՏ, ապրիլի 17, ԱՐՑԱԽՊՐԵՍ: Երեկոյին՝ ԱՀ Ազգային Ժողովի նախագահ Աշոտ Ղուլյանը շնորհավորելով Ք. Հարությունյանի հոբելյանի առթիվ ասել է, որ իրեն բախտ է վիճակվել ծանոթանալու և մոտիկից շփվելու իր գործին նվիրյալ մարդու հետ: Ա. Ղուլյանի խոսքով՝ սովորելով Ստեփանակերտի մանկավարժական ինստիտուտում, դեռևս այդ ժամանակից Ք. Հարությունյանն 
ստեղծել է ինքնագործ թատերական խումբ և ներկայացումներով հանդես եկել Արցախի բոլոր շրջաններում: ԱԺ նախագահը նշել է նաև, որ դերասան Ք. Հարությունյանը կարողացել է իր սերը, նվիրումը, տաղանդը, ասմունքի շնորհը փոխանցել թատրոնի երիտասարդ դերասաններին:
«Ես ուրախ եմ, որ մեր երկիրն ըստ արժանվույն է գնահատել Ք. Հարությունյանի արվեստը՝ արժանացնելով նրան ԱՀ ժողովրդական արտիստի կոչման: Հույս ունեմ, որ այսուհետ էլ տաղանդաշատ արտիստը կշարունակի իր ներդրումն ունենալ Արցախի թատերական արվեստի զարգացման գործում»,- մասնավորապես նշել է Ա. Ղուլյանը:
ԱՀ մշակույթի, երիտասարդության հարցերի և զբոսաշրջության նախարար Սերգեյ Շահվերդյանը ևս կարևորել է Ք. Հարությունյանի դերը Ստեփանակերտի Վահրամ Փափազյանի անվան պետական դրամատիկական թատրոնի կայացման գործում:
Նա նշել է, որ հանդիսատեսը միշտ էլ ընդունել, սիրել ու ամեն անգամ նորովի է ընդունել Ք. Հարությունյանի բեմելը:
«Արցախպրես»-ի թղթակցի հետ զրույցում Ք. Հարությունյանն ասել է, որ իր ապրած 70 տարիներից 54-ը նվիրել է թատրոնին, որի ընթացքում ինքը խաղացել է շուրջ 150 դեր: Իր սիրելի դերերից մեկը նա համարում է Հովհաննես Թումանյանի «Գիքոր»-ում Համբոյի դերակատարումը: Դերասանն ասել է, որ ինքը դեռևս խաղալու երազած դերեր ունի: «Եթե ունենանք թատրոնի շենքային պայմաններ, մասամբ կկարողանամ իրականացնել երազանքներս: Թատրոնն իմ կյանքն է. առանց բեմի ես չեմ պատկերացնում իմ օրը: Իմ ողջ գիտակցական կյանքում աշխատել եմ հուսախաբ չանել իմ հանդիսատեսին: Կարծում եմ՝ դա ինձ հաջողվել է»,-մասնավորապես ասել է Ք. Հարությունյանը: Խոսելով նոր ներկայացումների մասին՝ Ք. Հարությունյանը տեղեկացրել է, որ առաջիկայում կբեմադրվեն «Ռոմեո և Ջուլիետ», «Կատուն շիկացած տանիքին» ներկայացումները:
Երեկոյին հնչել են նաև Ք. Հարությունյանի գործընկերների, ընկերների, երիտասարդ դերասանների շնորհավորանքները: Սլայդների միջոցով ցուցադրվել են նրա խաղացած թատերական ներկայացումներից հատվածներ: Ք. Հարությունյանն իր խաղացած դերերից նաև հատվածներ է ներկայացրել հանդիսատեսին:
Վերջում հոբելյարը շնորհակալություն է հայտնել հանդիսատեսին իր՝ ծննդյան օրը տոնի վերածելու համար:
