Խորհրդարանում առաջին ընթերցմամբ ընդունվել է «Առևտրաարդյունաբերական պալատի մասին» ԱՀ օրենքը:
Խորհրդարանն «Առևտրաարդյունաբերական պալատի մասին» օրենք է ընդունել
ՍՏԵՓԱՆԱԿԵՐՏ, ապրիլի 21, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ «Առևտրաարդյունաբերական պալատի մասին» որոշման նախագիծը ԱԺ լիագումար նիստին ներկայացրել է ԱՀ էկոնոմիկայի, արտադրական ենթակառուցվածքների նախարարի տեղակալ Տիգրան Թորոսյանը՝ մանրամասնելով, որ սույն օրենքի նախագիծը Արցախում ներկայացվում է առաջին անգամ:
«Օրենքը սահմանում է ԱՀ առևտրական պալատի կազմակերպա-իրավական ձևը, առևտրաարդյունաբերական պալատի ստեղծման ընդհանուր իրավական հիմքերը և կարգավորում դրա գործունեության հետ կապված հարաբերությունները: Առևտրաարդյունաբերական պալատ է հանդիսանում սույն օրենքով սահմանված կարգով և կամավոր անդամության հիման վրա գրանցված իրավաբանական անձանց և անհատ ձեռնարկատերերի կողմից ստեղծված, իրենց ընդհանրական շահերը ներկայացնող ոչ առևտրային կազմակերպությունը: Պալատի ստեղծման և գործունեության հիմնական նպատակն է օրենսդրությամբ սահմանված լիազորությունների շրջանակներում իր անդամների ընդհանուր շահերի և իրավունքների պաշտպանությունը, դրանց ներկայացումը ԱՀ պետական կառավարման, ինչպես նաև տեղական ինքնակառավարման մարմինների հետ փոխհարաբերություններում և օտար երկրներում»,- ասել է Տ. Թորոսյանը:
Նա անդրադարձել է նաև պալատի խնդիրներին՝ նշելով, որ այն կարող է նպաստել ԱՀ տնտեսական զարգացմանը և այլ միջազգային տնտեսական համակարգի ինտեգրելուն, ձեռնարկատիրական բոլոր ձևերին համակողմանի և ներդաշնակ զարգացմանն օժանդակելուն, օտարերկրյա ձեռնարկատերերի հետ առևտրատնտեսական և գիտատեխնիկական կապերի ամրապնդմանն աջակցելուն, ձեռնարկատիրական գործունեության համար բարենպաստ միջավայրի ձևավորմանը, ԱՀ-ի կողմից սահմանված գերակայութուններին համապատասխան՝ Արցախում ձեռնարկատիրության ոլորտի կադրերի պատրասման, վերապատրաստման և որակավորման բարձրացման համակարգի կայացմանն ու զարգացմանը:
Օրենքը սահմանում է նաև պալատի ստեղծման, ղեկավարման և կառավարման կարգերը, ինչպես նաև ընթացիկ գործունեության սկզբունքները:
Գլխադասային հանձնաժողովի եզրակացությունը ներկայացրել է ԱԺ արտադրության և արտադրական ենթակառուցվածքների հանձնաժողովի նախագահ, պատգամավոր Արպատ Ավանեսյանը՝ նշելով, որ հանձնաժողովը դրական եզրակացություն է տվել և որպես մայր օրենք՝ առաջարկում է առաջին ընթերցմամբ ընդունել: