Երևանից ժամանած մի խումբ բժիշկներ, ԱՀ առողջապահության նախարարության «Բաց դռների օր» միջոցառման ծրագրի շրջանակներում, Ստեփանակերտի «Մոր և մանկան առողջության պահպանման կենտրոն» ՓԲԸ-ում անվճար հիմունքներով իրականացնում են քաղաքացիների հետազոտություններ, խորհրդատվություններ, վիրահատություններ:
Երևանից ժամանած բժիշկները Ստեփանակերտի ծննդատանն իրականացնում են անվճար հետազոտություններ և վիրահատություններ
ՍՏԵՓԱՆԱԿԵՐՏ, ապրիլի 21, ԱՐՑԱԽՊՐԵՍ: «Արցախպրես»-ի թղթակցի հետ զրույցում ՀՀ մոր և մանկան առողջության պահպանման գիտահետազոտական կենտրոնի տնօրեն, Երևանի Մխիթար Հերացու անվան պետական բժշկական համալսարանի հետբուհական և շարունակական կրթության ֆակուլտետի մանկաբարձության և գինեկոլոգիայի ամբիոնի վարիչ, պրոֆեսոր Գեորգի Օկոևն ասել է, որ երկօրյա այցի ընթացքում իրենք նպատակ ունեն տեղի մասնագետների հետ համատեղ աշխատանքի ընթացքում կիսվել փորձով, քննարկել մի շարք հարցեր և իրականացնել լապարասկոպիկ և էնդոսկոպիկ վիրահատություններ:
Գ. Օկոևի խոսքով, ըստ առաջնահերթության և բարդության աստիճանի, այս անգամ նախատեսել են իրականացնել շուրջ 10 վիրահատություն:
Խոսելով տեղի բժշկական սարքավորումների մասին՝ Գ. Օկոևը նշել է, որ Ստեփանակերտի ծննդատան և հանրապետական բժշկական կենտրոնի պայմանները թույլ են տալիս, որ տեղում իրականացվի էնդոսկոպիկ և լապարասկոպիկ վիրահատություններ:
Նա նշել է, որ Ստեփանակերտ ժամանած մասնագետների թվում են նաև մանկաբարձ-գինեկոլոգ, գինեկոլոգ-էնդոկրինոլոգ, ռեպրոդուկտոլոգ, բժիշկ սոնոգրաֆիստ, անեսթեզիոլոգ-ռեանիմատոլոգ և էնդոսկոպիկ վիրաբույժներ:
Ըստ ՀՀ մոր և մանկան առողջության պահպանման գիտահետազոտական կենտրոնի տնօրենի՝ իրենք ամռվա շրջանում նախատեսում են Ստեփանակերտ ևս մեկ այց, որի ընթացքում կրկին իրենց կողմից կիրականացվեն քաղաքացիների հետազոտություններ և վիրահատություններ: Այցի ընթացքում կլինեն նաև նորածնային վերակենդանացմանբաժանմունքի մասնագետներ, ովքեր տեղի մասնագետներին կուսուցանեն առողջապահության ոլորտում երեխայի խնամքի հմտությունների մասին վերջին նորությունները:
Մեր զրուցակիցը տեղեկացրել է նաև, որ իրենց պատվիրակությանն ընդունել է ԱՀ առողջապահության նախարար Կարինե Աթայանը և քննարկել առողջապահական համակարգին վերաբերող մի շարք հարցեր:
Տեղեկացնենք, որ Երևանից ժամանած բժիշկները Ստեփանակերտի ծննդատանն աշխատելու են ապրիլի 21-22-ը: Լրացուցիչ տեղեկությունների համար ցանկացողները կարող են նշված օրերին դիմել Ստեփանակերտի «Մոր և մանկան առողջության պահպանման կենտրոն» կամ զանգահարել (047) 94-38-86 հեռախոսահամարով: