Մամուլի ազատությունը լրագրողի գլխավոր գործիքն է: Եթե չկա այդ ազատությունը, ապա ինչի մասին պետք է գրել:
Մամուլի ազատությունը լրագրողի գլխավոր գործիքն է. Կիմ Գաբրիելյան
ՍՏԵՓԱՆԱԿԵՐՏ, մայիսի 3, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Արցախի ժուռնալիստների միության նախագահ Կիմ Գաբրիելյանն՝ անդրադառնալով այսօրվա խորհրդին՝ մամուլի ազատության միջազգային օրվան:
«Մամուլի ազատությունը ուղիղ համեմատական է հասարակության ազատությանը: Ինչքանով հասարակությունը ինքն է ազատ, նույն չափով ազատ է նաև մամուլը: Սակայն այստեղ կան նաև այլ գործոններ, մասնավորապես՝ ֆինանսական գործոնը, քանի որ մամուլը ենթադրում է նաև խնդիրներ՝ կապված դրա պահպանման հետ: Իհարկե, Արցախում լրատվամիջոցներ համեմատաբար քիչ կան, որպեսզի մենք կարողանանք արձանագրել, որ կա մամուլի լիարժեք դաշտ, սակայն օրենսդրական առումով դաշտը պաշտպանված է, իսկ թե ինչքանով է կիրառվում, խնդրի մեկ այլ կողմն է: Յուրաքանչյուր լրագրող ինքն է գծում իր ազատության սահմանը: Աշխատելով որևէ լրատվամիջոցում՝ լրագրողը որդեգրում է նաև այս կամ այն լրատվամիջոցի պահանջները, սակայն մեծ հաշվով լրագրողի ներքին ազատությունը մեծ նշանակություն ունի: Կարծում եմ՝ Արցախում խնդիր ունենք լրագրողների ավելի ազատական մտածողության, լրատվամիջոցների ցանցի ընդլայնման, որը հնարավորություն կտա մրցակցության՝ լրագրողների համար ստեղծելով տարածք իրենց ազատությունը դրսևորելու համար»,- նշել է Կ. Գաբրիելյանը:
Արցախի ժուռնալիստների միության նախագահը կարծում է նաև, որ մամուլի ազատությունը չունի տեխնիկական բնութագիր, ավելին, այն ունի բարոյական, գաղափարական, իրավական կողմեր, որոնք ձևավորում են ազատությունը:
«Ազատության սահմանագիծը որոշակիորեն փակ է, քանի որ կախված է տնտեսական, սոցիալական, քաղաքական, ինչպես նաև կուսակցական շահերից: Մեր օրերում համացանցի շնորհիվ հոդվածներն ու հրապարակումները տարածվում են առավել մեծ լսարանի համար: Սա հնարավորություն է, որպեսզի լրագրողները կարողանան իրենց կարծիքն ու վերաբերմունքը ավելի մեծ լսարանի փոխանցել: Սակայն կա նաև մեկ այլ հարց: Այսօր կան բլոգներ, որոնց միջոցով մարդիկ արտահայտում են սիրողական կարծիքներ: Այս դեպքում երկրորդ պլան է մղվում լրագրողի արհեստավարժությունը, որը պետք է դիտարկվի պրոֆեսիոնալ դաշտ ձևավորելու համար»,- ավելացրել է Կ. Գաբրիելյանը: