Նոյեմբերի 28-ին Մեծամորում` Հայաստանի ատոմային էլեկտրակայանի տարածքում, անցկացվեց ոստիկանության զորքերի մարտավարամասնագիտական զորավարժություն, որին ներկա էին ոստիկանության պետ, գեներալ-լեյտենանտ Վլադիմիր Գասպարյանը, ոստիկանության պետի տեղակալ, գեներալ-լեյտենանտ Լեւոն Երանոսյանը, կոլեգիայի անդամներ, բարձրաստիճան սպաներ:
Զորավարժություն Մեծամորում. Դիվերրսիոն խմբի հայտնաբերում եւ վնասազերծում
ՍՏԵՓԱՆԱԿԵՐՏ, 29 ՆՈՅԵՄԲԵՐԻ, ԱՐՑԱԽՊՐԵՍ: NEWS.am-ի փոխանցմամբ՝ զորավարժության սցենարով նախատեսված էր հավանական հակառակորդի դիվերսիոն հետախուզական խմբերի հայտնաբերման եւ վնասազերծման հատուկ գործողությունը վարժանքում ընդգրկված զորամասերի մասնակցությամբ:
Զորավարժությունը բաղկացած էր 2 փուլից: 1-ին փուլում հատուկ նշանակության գումարտակն իրականացնում է հակառակորդի խմբերի հայտնաբերման եւ վնասազերծման զորային գործողություններ ՀԱԷԿ-ի հարակից տարածքում, 2-րդ փուլում ՀԱԷԿ-ի պահպանության առանձին գումարտակը վնասազերծում է պահպանվող օբյեկտ թափանցած դիվերսիոն հետախուզական խումբը: Ի տարբերություն մյուս հատուկ գործողությունների՝ այս զորավարժությունն իրականացվում է հավանական հակառակորդի խմբերի ոչնչացման հատուկ մարտավարական գործողություններով:
Գումարտակների երթը ծածուկ էր, նախապես որոշված երթուղիներով: Ստորաբաժանումները կազմակերպեցին մարտական պահպանություն՝ հակառակորդի անակնկալ հարձակումներից պաշտպանվելու նպատակով: Ըստ սցենարի` հակառակորդի 10 հոգանոց դիվերսիոն հետախուզական խումբը կենտրոնացել է քարհանքի շրջանում: Քողարկվող խումբը ազդականչով շարժվում է դեպի ՀԱԷԿ՝ նպատակ ունենալով ներթափանցել պահպանվող օբյեկտի տարածք:
Ոստիկանության հատուկ նշանակության գումարտակի ստորաբաժանումները շրջափակում են հատուկ օպերացիայի շրջանը եւ ուժեղացնում դիտարկումը հակառակորդի շարժման հավանական ուղղություններով: Ապա ստորաբաժանումները զբաղեցնում են ելման բնագծերը երկկողմանի որոնում իրականացնելու համար: Վարժանքին մասնակցող ստորաբաժանումները նախատեսված ժամկետում տեղեկացրին, որ հայտնաբերել են հակառակորդին, որը փորձում է դուրս գալ շրջափակումից եւ մարտի մեջ է մտել մեր ստորաբաժանումների հետ:
Կորուստներ տալով՝ հակառակորդը բաժանվում է մանր խմբերի եւ փորձում մի քանի ուղղություններով դուրս գալ շրջափակումից: Մի խումբը շարժվում է դեպի հյուսիս եւ մարտի բռնվում ՈԶ ստորաբաժանումների հետ: Հաջողվում է կենտրոնացված կրակի եւ ստորաբաժանումների կտրուկ մարտավարական գործողություններով վնասազերծել խումբը: Հակառակորդի 2-րդ խումբը, օգտագործելով տեղանքը, փորձում է ձորակով դուրս գալ ՀԱԷԿ-ի պահպանության պարագիծ: Այդ խումբը վնասազերծելու նպատակով հատուկ նշանակության գումարտակի հրամանատարը մարտի մեջ է մտցնում պահեստազորը, որը ստորաբաժանումների եւ կրակի խուսավարման միջոցով շրջափակում ու վնասազերծում է հակառակորդին:
Երկու դիվերսանտ ձերբակալվում են: Չնայած մեր ստորաբաժանման հաջողությանը՝ դիվերսանտների մի փոքր խմբի հաջողվում է թափանցել ՀԱԷԿ-ի տարածք: Այդ պահից սկսվում է զորավարժության 2-րդ փուլը, եւ գործողության մեջ են մտնում ՀԱԷԿ-ի պահպանության առանձին գումարտակի ստորաբաժանումները:
Օբյեկտի պահպանության պահակախումբը բարձրացվում է տագնապով: Մարտ է սկսվում պահակախմբի պահեստային խմբի եւ 2 դիվերսանտների միջեւ, որոնցից մեկը ոչնչացվում է, մյուսը` գերի վերցվում: Դիվերսանտների այս գործողությունն ուշադրություն շեղելու նպատակ ունի. այդ ընթացքում պահպանության պարագծի մեկ այլ տեղամասից օբյեկտ է թափանցում դիվերսիոն-հետախուզական 2-րդ խումբը: ՀԱԷԿ-ի պահպանության առանձին գումարտակի ստորաբաժանումները զբաղեցնում են ելման բնագծեր: Հայտնաբերելով հակառակորդին՝ որոնող խումբը կենտրոնացված կրակով ստիպում է նրան նահանջել: ԴՀԽ-ն դիրքավորվում է առանձին շինության մեջ:
Գումարտակի հրամանատարը որոշում է կայացնում հակառակորդին վնասազերծելու համար հատկացնել ձերբակալման խումբ, որը զրահատեխնիկայի աջակցությամբ մոտենում է շինությանը եւ վնասազերծում հակառակորդի դիվերսիոն-հետախուզական խումբը: Այնուհետեւ ստորաբաժանումները զննություն են կատարում գործողության ողջ տարածքում՝ հակառակորդի խմբի հետախուզական եւ դիվերսիոն միջոցները հայտնաբերելու նպատակով: Զորավարժության ղեկավարի ազդականչով հայտարարվում է զորավարժության ավարտը:
Զորավարժությունից հետո ոստիկանության պետը շրջեց ատոմակայանի պահպանությունն իրականացնող զորամասում, ծանոթացավ զինծառայողների աշխատանքային ու հանգստի պայմաններին, ծառայության կազմակերպման առանձնահատկություններին: Դիմելով զորավարժության մասնակիցներին՝ Վլադիմիր Գասպարյանը դրական գնահատեց առաջադրված մարտավարամասնագիտական խնդիրների կատարման մակարդակը:
Ոստիկանության պետ Վլադիմիր Գասպարյանի եւ ոստիկանության զորքերի հրամանատար Լեւոն Երանոսյանի հրամաններով պարգեւատրվեցին զորավարժության ընթացքում մարտական եւ մասնագիտական պատրաստականությամբ աչքի ընկած զինծառայողները:
