Արցախի պետական համալսարանի պատմության և իրավագիտության ֆակուլտետի նախաձեռնությամբ բուհում կազմակերպվել է «Մարդու իրավունքների պաշտպանությունը չճանաչված երկրներում» թեմայով գիտաժողով՝ նվիրված արցախյան շարժման 30-ամյակին:
ԱրՊՀ-ում կազմակերպվել է «Մարդու իրավունքների պաշտպանությունը չճանաչված երկրներում» թեմայով գիտաժողով
ՍՏԵՓԱՆԱԿԵՐՏ, մայիսի 21, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ գիտաժողովի ընթացքում զեկույցներով հանդես են եկել իրավագիտություն 3-րդ կուրսի ուսանողները: Մասնավորապես գիտական տեսանկյունից ներկայացվել են չճանաչված երկրներում մարդու իրավունքներին և ազատություններին վերաբերող խնդիրները:
Գիտաժողովի ընթացքում հատուկ ուշադրություն է դարձվել Արցախի նոր Սահմանադրության մեջ մարդու և քաղաքացու հիմնական իրավունքներին վերաբերող դրույթներին, կարևորվել է դրանց ընդգրկուն լինելը: Մասնավորապես այս թեմայով զեկույց է ներկայցրել ԱրՊՀ իրավագիտություն 3-րդ կուրսի ուսանողուհի Մալունա Ներսեսյանը:
Նա գիտաժողովին հանդես գալով «Արցախի նոր Սահմանադրությունը, որպես մարդու հիմնական իրավունքների պաշտպանության երաշխիք» թեմայով, ասել է, որ ցանկացած ժողովրդավարական և իրավական պետության Սահմանդրության առաջնային խնդիրներից է մարդու և քաղաքացու հիմնական իրավունքների սահմանադրական ամրագրումը և դրանց պաշտպանության երաշխավորումը: Այն, թե ինչ բնույթ ունեն մարդու հիմնական իրավունքների սահմանադրական կարգավորումները և որքանով են դրանք համահունչ համընդհանուր ճանաչում ստացած միջազգային փաստաթղթերի ոգուն, թույլ է տալիս նաև դատողություններ անել պետության առաջադիմական, իրավական և ժողովրդավարական լինելու հանգամանքի մասին:
Նա իր զեկույցում նշել է նաև, որ ԱՀ անկախության միջազգային ճանաչումը, նրա քաղաքացիների իրավունքների և ազատությունների ապահովումն ու պաշտպանությունը կախված են սահմանադրական պահանջները հետևողականորեն և անշեղորեն կատարելու՝ ժողովրդի քաղաքական կամքից:
«Պետք է նշել, որ ԱՀ ներկա Սահմանդրությունը և օրենսդրական հիմքը անհրաժեշտ, բայց ոչ բավարար պայման է՝ ճանաչված և քաղաքակիրթ երկրների հետ նույն շարքում կանգնելու համար: Չափազանց կարևոր է, որ քաղաքցիների իրավունքների և ազատությունների պահպանումը մեզ համար դառնա ամենօրյա նորմ և իրողություն, որպեսզի հասարակական հարաբերությունների հիմքում ընկած լինեն հարգանքը օրենքի և անհատի հանդեպ»,-ավելացրել է Մ. Ներսեսյանը:
Արձագանքելով ուսանողների ելույթներին՝ ԱրՊՀ իրավունքի ամբիոնի դասախոս Հասմիկ Խաչատրյանն ասել է, որ պրակտիկ փորձը ցույց է տալիս, որ արցախցիների իրավագիտակցության մակարդակը բավականին բարձր է:
«Մենք իրավական պետություն չենք համարվի, եթե մեր կողմից ընդունված օրենքներն ինքներս խախտենք: Եթե յուրաքանչյուր անհատ իմանա ու գիտակցի իր իրավունքների մասին ու որևէ մեկի իրավունքները չխախտի կամ չսահմանափակի ազատությունները, կլինենք ավելի իրավագիտակից»,-նշել է մեր զրուցակիցը և ավելացացրել, որ այս գիտաժողովն առաջին հերթին մարդու իրավունքների և ազատությունների մասին տեղեկատվություն է:
Ըստ Հ. Խաչատրյանի՝ եվրոպական դատարանի վճիռները նախադեպային են, որոնց մեջ ամրագրված և արտահայտված տեսակետներն օգտագործվում են ինչպես ԱՀ դատական ակտերում, այնպես էլ առօրյա կյանքում: ԱՀ Սահմանադրությունն ու օրենսդրությունն ամբողջովին համապատասխանում են Եվրոպական միջազգային չափանիշներին:
Միջոցառմանը ներկա էին ԱՀ գերագույն դատարանի նախագահ Նարինե Նարիմանյանը, ԱրՊՀ ռեկտոր Մանուշ Մինասյանը, իրավունքի ամբիոնի ուսանողներ և դասախոսներ:
