ՍՏԵՓԱՆԱԿԵՐՏ, հունիսի 4, ԱՐՑԱԽՊՐԵՍ: «Արցախպրես»-ի թղթակցի հաղորդմամբ նիստի մասնակիցներն անդրադարձել են օրակարգային երկու հարցերի՝ Ազգային ժողովի քննիչ հանձնաժողովի անդամների թիվը սահմանելու վերաբերյալ ԱԺ որոշման նախագծին և 2018 թվականի հունիսի 1-ին Ստեփանակերտւմ տեղի ունեցած միջադեպի արդյունքում ստեղծված իրավիճակին:

Նիստին ԱԺ նախագահ Աշոտ Ղուլյանը մինչ օրակարգային հարցերին անդրադառնալը, խոսել է հունիսի 1-ին տեղի ունեցած միջադեպի և դրան հետևած զարգացումների մասին:

ԱԺ նախագահն ասել է, որ Խորհրդարանի բոլոր խմբակցությունները ներգրավված են եղել խնդրի կարգավորման և համերաշխության մթնոլորտի վերականգնաման քայլերին, ինչպես հավաքների կազմակերպիչների հետ հանդիպումներին, այնպես էլ ԱՀ Նախագահի մոտ բազմաթիվ խորհրդակցություններին և քննարկումներին մասնակցելու առումով:

Նիստին՝ պատգամավորների կողմից քննարկվել և միաձայն հաստատվել է Ազգային ժողովի քննիչ հանձնաժողովի անդամների թիվը սահմանելու վերաբերյալ ԱԺ որոշման նախագիծը:

Ըստ որոշման՝ քննիչ հանձնաժողովում ընդգրկված են 6 պատգամավոր, այդ թվում՝ 2-ը «Հայրենիք» և մեկական էլ մյուս 4 խմբակցություններից: Քննիչ հանձնաժողովի անդամներն են ԱԺ պատգամավորներ՝ Ռոմելա Դադայանը, Արամ Գրիգորյանը, Ալյոշա Գաբրիելյանը, Դավիթ Մելքումյանը, Հայկ Խանումյանը: Հանձնաժողովի նախագահն է Էդուարդ Աղաբեկյանը. նիստից հետո կքննարկվի նաև վերջինիս տեղակալի անունը:

Նկատի ունենալով 2018 թվականի հունիսի 1-ին Ստեփանակերտւմ տեղի ունեցած միջադեպի արդյունքում ստեղծված իրավիճակը և դրա հրատապությունն ԱՀ ԱԺ պատգամավորները իրենց մտահոգություններն են հայտնել և իշխանությանը հորդորել արդարացի լուծումներ տալ հասարակության կողմից բարձրացված հարցերին: