ԼՂՀ ընդհանուր իրավասության առաջին ատյանի դատարանում շարունակված, ընթացիկ տարվա հուլիսին Շահումյանի շրջանով ԼՂՀ պետական սահմանն ապօրինաբար հատած ադրբեջանական հետախուզական-դիվերսիոն խմբի երկու անդամների՝ Շահբազ Գուլիևի եւ Դիլհամ Ասկերովի գործով դատական նիստում, այսօր , որպես գործով վկա, ներկա էր մոտ մեկ տարի առաջ Ադրբեջանում գերեվարված ՊԲ ժամկետային նախկին զինծառայող Հակոբ Ինջիղուլյանը:
Հակոբ Ինջիղուլյանը ցուցմունքի ժամանակ ճանաչել է ադրբեջանցի դիվերսանտին
ՍՏԵՓԱՆԱԿԵՐՏ, 3 ԴԵԿՏԵՄԲԵՐԻ, ԱՐՑԱԽՊՐԵՍ։ Նշենք, որ դիվերսիոն խմբի անդամների ձերբակալման ժամանակ նրանց մոտ հայտնաբերված տեսախցիկում, ի թիվս այլ տեսանկարահանումների, առկա է եղել նաև Ադրբեջանում Հակոբ Ինջիղուլյանի հարցաքննությունը ներկայացնող տեսանյութ:
Դատական նիստին հրավիրված համակարգչային մասնագետի օգնությամբ՝ վկա Հակոբ Ինջիղուլյանը նախ ծանոթացել է Ադրբեջանում հարցաքննության ժամանակ նկարահանված տեսանյութին, որից հետո պատասխանելով դատավորի, պետական մեղադրողի և դատապաշտպանների հարցերին ու նշել, որ գերության՝ ընթացքում՝ հարցաքննությունների ժամանակ, ադրբեջանցիները փոքր տեսախցիկով տեսանկարահանումներ են կատարել։ Ըստ Իջիղուլյանի՝ դատական նիստում, որպես իրեղեն ապացույց, ներկայացված սպանված դիվերսանտ Հասան Հասանովի մոտ հայտնաբերված տեսախցիկն արտաքին տվյալներով համապատասխանում է ադրբեջանական բանտում իր հարցաքննության ընթացքում օգտագործված տեսախցիկին: Ավելին, տեսնելով Հասանովի նկարը՝ Իջիղուլյանը ճանաչել է նրան `հաստատելով, որ նա ներկա էր եղել իր հարցաքննություններին, ինչը հաստատում է ամբաստանյալ Ասկերովի այն ցուցմունքները, որ Հասանովը կապ է ունեցել Ադրբեջանի հատուկ ծառայությունների հետ:
Դատական նիստի ավարտին, դատավոր Անատոլի Թադևոսյանը հայտարարեց դատաքնության փուլի ավարտը և հավելեց, որ դեկտեմբերի 12-ին կսկսվի դատական վիճաբանության փուլը:
«Արցախպրեսը» ևս հետևում է դատավարության ընթացքին և հաջորդիվ կներկայացնի քրեական գործի այլ մանրամասներ։
