Հայաստանում դոլարի փոխարժեքը գերարժևորված է, սակայն այն պարտադիր կնվազի, չորեքշաբթի լրագրողներին հայտարարեց ՀՀ ԿԲ նախագահ
Հայաստանում դոլարի փոխարժեքը գերարժևորված է, սակայն այն պարտադիր կնվազի. Ջավադյան
ՍՏԵՓԱՆԱԿԵՐՏ, 17 ԴԵԿՏԵՄԲԵՐԻ, ԱՐՑԱԽՊՐԵՍ։ Հայաստանում արտարժույթի փոխարժեքի կտրուկ բարձրացում գրանցվեց նոյեմբերի 24–ին, երբ փոխարժեքն ավելացավ 16,6 կետով` հասնելով 1 դոլարի դիմաց 435 դրամի և թարմացնելով 8 տարվա առավելագույն ցուցանիշը։ Դոլարի փոխարժեքն ամեն օր աճի միտում է գրանցում և այսօրվա դրությամբ կազմում է 490,34 դրամ։
Ջավադյանի խոսքերով` նման գերարժևորման հիմնական պատճառներն են խուճապն ու ոմանց սպեկուլյացիաները։
«Դրամի իրական գինը հայտնի կլինի գերարժևորման պատճառները վերանայելուց հետո», – ասաց նա։ Միաժամանակ ԿԲ նախագահը ժամկետներ չնշեց։
«Ազգային արժույթը կարժևորվի, սակայն ժամկետները կախված են նաև շուկայում բնակչության վարքից, որը անհիմն խուճապային ֆոն է ստեղծում», – ասաց նա։
Ջավադյանը նաև նշեց, որ խուճապային ֆոնն առավելապես պայմանավորված է Ռուսաստանում տիրող իրավիճակով։ Նա նաև զգուշացրեց սպեկուլյացիաների համար նախատեսված պատասխանատվության մասին` կոչ անելով բնակչությանը ձեռնպահ մնալ անհիմն արտարժութային գործառնություններից և իրավիճակից օգուտ քաղելու փորձերից, քանի որ դա կարող է հանգեցնել մեծ ֆինանսական կորուստների։
Նրա խոսքերով` նմանատիպ իրավիճակ էր գրանցվել հարևան Վրաստանում, սակայն այդ երկրում խուճապը բավականին շուտ անցավ, և իրավիճակը կայունացավ։
ՀՀ վարչապետ Հովիկ Աբրահամյանը չորեքշաբթի հանդես է եկել հայտարարությամբ, որում, մասնավորապես, նշվում է, որ գլոբալ միտումների նման տարերային զարգացումների պարագայում ՀՀ կառավարությունը շարունակում է հավատարիմ մնալ լողացող փոխարժեքի որդեգրված քաղաքականությանը, ինչն անհրաժեշտ է տնտեսությունը երկարաժամկետ անկայունությունից զերծ պահելու համար։
Հայտարարության մեջ նշվում է, որ կառավարությունն աջակցում է ֆինանսական համակարգի կայունությանն ուղղված Կենտրոնական բանկի ջանքերին և ձեռնարկում է բոլոր միջոցառումները՝ ֆինանսական համակարգի բնականոն գործունեությունն ապահովելու, ՀՀ տնտեսվարողների և քաղաքացիների իրավունքներն ու շահերը պաշտպանելու համար:
«Կառավարությունը մշտական կապի մեջ է նաև իր միջազգային գործընկերների հետ, և վստահ է, որ համատեղ ջանքերով և սառը դատողությամբ մենք կարող ենք ապահովել կայունություն թե՛ ֆինանսական, թե՛ ապրանքների շուկաներում՝ այդ թվում բացառելով սպառողական ապրանքների անհիմն թանկացումները»,–ընդգծված է հայտարարությունում»։