Արցախում տուրիզմի ոլորտում արձանագրվել է մեծ առաջխաղացում, սակայն կան ոչ նպաստավոր երևույթներ։
ՀՀ-ից Արցախում Ամանորը նշել ցանկացող մարդկանց հոսք կա. ձմեռային տուրիզմը ԼՂՀ-ում
ՍՏԵՓԱՆԱԿԵՐՏ, 26 ԴԵԿՏԵՄԲԵՐԻ, ԱՐՑԱԽՊՐԵՍ։ Այս մասին Tert.am-ի հետ զրույցում ասաց Լեռնային Ղարաբաղի Հանրապետության կառավարությանն առընթեր զբոսաշրջության և պատմական միջավայրի պահպանության վարչության պետ Սերգեյ Շահվերդյանը։«Ամբողջ տարվա ընթացքում մենք այս տարի արձանագրել ենք միջազգային ներգնա զբոսաշրջիկների նվազում մոտավորապես 20 տոկոսով՝ նախորդ տարվա համեմատ: Այդ նվազումը կախված է մի շարք հանգամանքների հետ, որոնց մեջ վերջին տեղում չէ ամառային սահմանային լարվածությունը: Այն լայն հրապարակվել է աշխարհով մեկ և որոշակի բացասական ազդեցություն ունեցել Ղարաբաղում զբոսաշրջության զարգացման վրա»,-ասաց նա:
Չնայած դրան` Սերգեյ Շահվերդյանը նշեց, որ մյուս կողմից արձանագրվել է Հայաստանի Հանրապետությունում բնակվողների՝ Ղարաբաղ այցելությունների թվի մեծ աճ։ «Դա շատ հուսադրող է, որովհետև Հայաստանի Հանրապետությունը մեր նպատակային շուկաներից մեկն է»,-ասաց նա:
Ինչ վերաբերում է մասնավորապես ձմռանը, ապա նա նշեց, որ այն դեռ նոր է մտել իր իրավունքների մեջ և որևէ ընդհանրացված գնահատական դեռ վաղ է տալ: «Սակայն արձանագրվել է արդեն շատ դրական միտում, երբ ՀՀ մեր հայրենակիցները ցանկանում են Ամանորն անցկացնել Ղարաբաղում. ըստ հյուրանոցների տվյալների` մենք բավականին մեծ հոսք ունենք ամանորյա տոներին, որը շատ ոգևորիչ է»,-ասաց նա նշեց, որ Ամանորը Արցախում անցկացնել ցանկացող ՀՀ քաղաքացիներն այս տարի ավելի շատ են, քան անցած տարի։
Արցախի պաշտոնյան ասաց, որ Ղարաբաղում առկա են զարգացած զբոսաշրջային ենթակառույցներ՝ հատկապես հյուրանոցային տնտեսության օբյեկտներ: Նա նշեց, որ բացառությամբ տարվա ընթացքում երկու տոնական օրերի՝ մայիսի 9-ի և սեպտեմբերի 2-ի, այլ ժամանակաշրջաններում հյուրանոցներն ամբողջությամբ բավարարում են առկա զբոսաշրջիկների պահանջարկը:
«Ձմեռային տուրիզմի մասին Ղարաբաղում որպես այդպիսին խոսել դեռ վաղ է, որովհետև մենք չունենք ձմեռային տուրիզմին բնորոշ ենթակառուցվածքներ, ինչպիսին կան օրինակ Ծաղկաձորում կամ Ջերմուկում: Ձմեռային սեզոնը բավական ցածր սեզոն է մեզ մոտ համարվում»,-ասաց նա:
Սերգեյ Շահվերդյանը թեև կարծում է, որ Արցախի բնությունը ձմեռային տուրիզմի համար ամենանպաստավոր պայմաններն ունի, սակայն ձմեռային տուրիզմի զարգացումն առաջին հերթին հենց ենթակառույցների ձևավորումն է: «Դա բավականին մեծ ներդրումների խնդիր է, որի շուրջ մենք մտածում ենք, պոտենցիալ ներդրողների հետ բանակցում ենք և փորձում ենք նրանց ներգրավել ձմեռային զբոսաշրջությունը զարգացնելու գործընթացներում»,-ասաց նա:
«Ռումէա» գայթակղիչ ճամփորդությունների ակումբի գլխավոր տնօրեն Ռուբեն Գրիգորյանը նշեց, որ իրենք իրենց հաճախորդներին ուղղորդում են նաև Արցախ՝ ձմեռային հանգիստն անցկացնելու համար: «Այնտեղ լավ ծրագրեր կան, հետաքրքիր փաթեթներ, էքսկուրսիաներ, կացություն հյուրանոցում, տոնական միջոցառումներ կան և շատ մատչելի գներով»,-ասաց նա։ Տնօրենի տեղեկացմամբ՝ արցախյան փաթեթներն, ի տարբերություն հայաստանյան փաթեթների, 30-40%-ով էժան են:
Նա նշեց, որ թեև ձմռանը Արցախ այցելուների թվի աճ կա, սակայն այդ թիվն այնքան էլ մեծ չէ: Իսկ ինչ վերաբերում է արտերկրից այցելուներին, ապա Ռուբեն Գրիգորյանն ասաց, որ շատ քիչ թվով այցելուներ կան Ռուսաստանից:
«Ավելի շատ Արցախ այցելում են տարվա մյուս եղանակներին»,-ասաց նա և նշեց, որ ձմռանը հյուրանոցային տեղերի պակաս Արցախում չկա:
«Ջոել» զբոսաշրջային ընկերության տնօրեն Սոնա Եղիազարյանը նշեց, որ իրենց տուրիստական գործակալությունում այս պահի դրությամբ պահանջարկ չկա, թեև ավելի՝ մոտ 10 տոկոսով մատչելի են Արցախի փաթեթները:
«Արցախն ավելի շատ ամռան սեզոնին է հետաքրքիր»,-ասաց նա և նշեց, որ ձմռանը Հայաստանից ավելի շատ ծովափնյա երկրներ են նախընտրում գնալ:
