Ամերիկայի հրեաների կոմիտեն Հայոց ցեղասպանության 99-րդ տարելիցի կապակցությամբ հանդես է եկել հիշատակի ուղերձով: Ինչպես հաղորդում է «Արցախպրես»-ը, այս մասին տեղեկացնում է Le Monde պարբերականը:
Ամերիկայի հրեաների կոմիտեն ուղերձ է հղել Հայոց ցեղասպանության տարելիցի կապակցությամբ
Ամերիկայի հրեաների կոմիտեն Հայոց ցեղասպանության 99-րդ տարելիցի կապակցությամբ հանդես է եկել հիշատակի ուղերձով:
Ինչպես հաղորդում է «Արցախպրես»-ը, այս մասին տեղեկացնում է Le Monde պարբերականը:
«Նախորդ հարյուրամյակի կոտորածների հանդիսավոր հիշատակման ամսվա ընթացքում, սկսած Ռուանդայի ցեղասպանության 20-րդ տարելիցից մինչև Իսրայելում ու ԱՄՆ-ում Հոլոքոստի ամենամյա հիշատակման արարողությունները, մենք կանգ ենք առնում Օսմանյան կայսրության վերջին տարիներին իրականացված Մեծ Եղեռնի` Հայոց ցեղասպանության 1.5 միլիոն հաշվվող զոհերի հիշատակի ողբերգական տուրքի առջև»,-նշվում է կոմիտեի հայտարարության մեջ: Ամերիկայի հրեաների կոմիտեն կոչ է անում Օսմանյան կայսրության կործանումից մի քանի տարի հետո հիմնված Թուրքիայի Հանրապետությանը ոչ միայն թույլատրել մուտք գործել պատմական արխիվներ, որոնք կվերաբերեն զանգվածային կոտորածի այդ մութ շրջանին, այլ նաև անդրադարձ կատարել փաստաթղթերի պարունակած իրականությանը` ընդգծելով, որ շուրջ մեկդարյա վերքի ապաքինումը կարող է սկսվել միայն այն ժամանակ, երբ Թուրքիան կառերեսվի այդ ցավոտ ժամանակաշրջանի ճշմարտության հետ:
Կոմիտեի գործադիր տնօրեն Դևիդ Հարիսը մարդկության դեմ գործած անընդունելի հանցագործություն է անվանել Օսմանյան իշխանությունների` էթնիկ հայերի նկատմամբ իրականացրած կոտորածները: Նրա հավաստմամբ` որպեսզի այլևս երբեք չկրկնվի կատարվածը, անհրաժեշտ է, որ այդ շրջանի իրադարձություններն ամբողջությամբ ընդունվեն: «Ինչպես ցավալի կերպով մեզ հիշեցնում են դրանց հաջորդած սարսափները, մենք բոլորս էլ պարտավորություն ունենք հիշել դրանք`որպես անհրաժեշտ քայլ ապագայում նմանօրինակ գործողությունները կանխելու համար: Մենք համերաշխ ենք բարի կամք ունեցող բոլոր այն մարդկանց հետ, ովքեր հիշում են Մեծ Եղեռնի 99-րդ տարելիցը` 20-րդ դարի առաջին, բայց ոչ վերջին էթնիկ բնաջնջման ու ցեղասպանության օրինակը»: