Ընդհանրապես Արթուր Մկրտչյան քաղաքական և պետական գործչի կերպարը՝ օժտված ազնվության, իր երկրին անմնացորդ նվիրման, քաղաքական բարձր ինքնագիտակցության հատկանիշներով, միշտ էլ պահանջված է եղել մեր պետականության ստեղծման ու կերտման տարիների ընթացքում։
Արթուր Մկրտչյանի ամենակարևոր հատկանիշը՝ ազնվության մարմնավորումն էր. Դավիթ Իշխանյան
ՍՏԵՓԱՆԱԿԵՐՏ, 16 ՓԵՏՐՎԱՐԻ, ԱՐՑԱԽՊՐԵՍ։ ԼՂՀ Գերագույն խորհրդի առաջին նախագահ Արթուր Մկրտչյանի ծննդյան 56-ամյակի կապակցությամբ, «Արցախպրես»-ի թղթակցի հետ զրույցում ասաց Արցախի ՀՅԴ ԿԿ ներկայացուցիչ Դավիթ Իշխանյանը՝ հավելելով, որ նրա ամենակարևոր հատկանիշը՝ ազնվության մարմնավորումն էր, որ թեև քաղաքականության և քաղաքագիտության մեջ գործչին ուղեկցող բնութագրական հատկանիշ չէ, բայց այնուհանդերձ արցախյան իրականության մեջ, որտեղ պետական այրի յուրաքանչյուր քայլ և հատկանիշ ակնհայտորեն աչքի է զարնվում, այդ հատկանիշն Ա. Մկրտչյանին արժանացրել է հասարակության սիրուն ու հարգանքին։
«Ա. Մկրտչյանը , թեև շատ կարճ ղեկավարեց, բայց այնուհանդերձ, դա այնպիսի ժամանակահատված էր, երբ հիմք էր դրվում անկախ Արցախի Հանրապետության պետականությանը։ Դրվում էին առաջին հիմնաքարերը, իսկ նա դարձավ և մնաց այն կարևոր հիմնաքարի հիմնադիրը, որի վրա սկսեց վեր խոյանալ Հայկական երկրորդ պետականությունը»,-ասաց Դ. Իշխանյանը։
Խոսելով Ա. Մկրտչյանի մասին, որպես գիտնականի ու մտավորականի, Դ. Իշխանյանը նշեց, որ այդ առումով դեռևս 1991 թվականից էին երևան եկել նրա կարողությունները։ Ա. Մկրտչյանը հանդես էր գալիս ոչ միայն գիտական հոդվածներով, այլ նաև կրակոտ ելույթներով, որոնք նրան արդեն ճանաչելի էին դարձրել հանրության լայն խավերի շրջանում։
«Դեռևս 20-23 տարեկանում նա արդեն ճանաչելի էր հայ իրականության մեջ՝ որպես լուրջ ապագա ունեցող գիտական դեմք։ Բայց պատմության և իրադրությունների թելադրանքով գիտնական ու մտավորական Ա. Մկրտչյանը ստիպված էր մտնելու քաղաքական դաշտ և իր վրա կրելու «պետական այր» կոչումը», - ասաց Դ. Իշխանյանը։
