Փետրվարի 19-ին Ամենայն հայոց բանաստեղծ Հովհաննես Թումանյանի ծննդյան օրը թբիլիսահայությունն այցելել է հայ գրողների և հասարակական գործիչների՝Խոջիվանքի պանթեոն, որտեղ ամփոփված է Մեծ Լոռեցու աճյունը:
Թբիլիսիում ծաղիկներ են խոնարհվել Ամենայն հայոց բանաստեղծի շիրիմին
ՍՏԵՓԱՆԱԿԵՐՏ, 20 ՓԵՏՐՎԱՐԻ, ԱՐՑԱԽՊՐԵՍ։Վիրահայոց թեմի մամլո հաղորդագրության համաձայն, նրանք իրենց հարգանքի տուրքն են մատուցել ժողովրդական մեծ բանաստեղծին ու իրենց խոնարհումը բերել նրա հիշատակի առջև: Մեծն Թումանյանի տապանաքարի մոտ, Վիրահայոց թեմի առաջնորդի հանդիսապետությամբ և հոգևոր դասի մասնակցությամբ կատարվել է հոգեհանգստյան կարգ:
Հավարտ արարողության, դիմելով ներկաներին, Գերաշնորհ Տեր Վազգեն եպիսկոպոս Միրզախանյանը գնահատանքի խոսքեր է ուղղել թբիլիսահայ մտավորականությանը ազգի մեծերի հիշատակը պահելու համար: Թեմակալ առաջնորդն իր խոսքում արժևորել է նաև Թբիլիսիի քաղաքապետարանի խնամատարությունը և ՀՀ Սփյուռքի նախարարության հոգատարությունը Խոջիվանքի Մեծաց մեծերի պանթեոնի նկատմամբ:
Բանաստեղծ, թարգմանիչ Անահիտ Բոստանջյանն, անդրադարձ կատարելով 10 տարի առաջ երջանկահիշատակ Լևոն Անանյանի՝ Հովհաննես Թումանյանի ծննդյան օրը գիրք նվիրելու նախաձեռնությանը, նշեց, որ ավանդական դարձած այս գործողությանը հավատարիմ՝ ինքը վերստին ներկաներին նվիրում է գրքեր իր հրատարակած և անձնական գրադարանից:
«Վրաստան» թերթի խմբագիր Վան Բայբուրթյանը ափսոսանքով նշեց, որ երիտասարդությունը կտրվել է գրքից և հեռացել ընթերցանությունից, կոչ անելով սիրել գիրքը, ակտիվորեն ընդգրկվել գիրք նվիրելու գեղեցիկ գործողությանը և այն դարձնել համընդհանուր:
Հովհաննես Թումանյանի չափածոյից գեղեցիկ ծաղկաքաղով և մայրենի լեզվին նվիրված բանաստեղծությունների արտասանությամբ հանդես են եկել «Հայարտուն» կենտրոնի ասմունքի խմբակի սաները ուսուցիչ՝ Սամվել Էլբակյանի գլխավորությամբ: Թբիլիսահայ մտավորականության ներկայացուցիչների, «Հայարտուն» կենտրոնի ստեղծագործական խմբերի սաների ու նրանց ուսուցիչների կողմից ծաղիկներ են խոնարհվել հայոց մեծերի տապանաքարերին:
