Ռիգայում «Արեւելյան գործընկերության» գագաթաժողովին Հայաստանի եւ Ադրբեջանի հանդեպ իր վերաբերմունքում Եվրամիությունը հաշվի է առել նաեւ պատվիրակությունների մակարդակը:
Փորձագետը՝ Ռիգայում Ադրբեջանի հավակնությունների մասին. ցանկանալը վնաս չէ
ՍՏԵՓԱՆԱԿԵՐՏ, 24 ՄԱՅԻՍԻ, ԱՐՑԱԽՊՐԵՍ։ NEWS.am-ի փոխանցմամբ այս մասին հայտարարել է քաղաքագետ Ստեփան Գրիգորյանը՝ մեկնաբանելով մայիսի 21-22-ին Ռիգայում անցկացված «Արեւելյան գործընկերության» գագաթաժողովի արդյունքները:
Փորձագետի խոսքով, Հայաստանը ներկայացել էր նախագահի մակարդակով, իսկ Ադրբեջանը՝ արտաքին գործերի նախարարի, եւ երկկողմ հանդիպումներում համաչափությունը խախտելու պատճառ չկար, ինչն էլ արտահայտվեց Հայաստանի նախագահ Սերժ Սարգսյանի եւ Գերմանիայի կանցլեր Անգելա Մերկելի հանդիպման փաստով:
«Զարմանալի ոչինչ չկա, որ ԵՄ-ի հետ ասոցացման չգնացող «Արեւելյան գործընկերության» երեք երկրներից Հայաստանին առանձնացնում են՝ ի տարբերություն Ադրբեջանի եւ Բելառուսի: Չնայած մենք չենք ստորագրել ասոցացման համաձայնագիրը, սակայն մեզ մոտ սկզբունքորեն այլ իրավիճակ է մարդկանց տեղաշարժի, վիզային ռեժիմի եւ հետընդունման պայմանագրի մասով, էլ չխոսենք մարդու իրավունքների եւ տնտեսական ազատությունների վիճակի մասին: Համաժողովի արդյունքներում ընդունված ոչ մի տեքստում այդ երեք երկրների հանդեպ միասնական մոտեցում չի արտահայտվում: Այդ թվում՝ հայկական պատվիրակության ներկայացրած փաստերի շնորհիվ, որի կազմում նաեւ ես էի ընդգրկված»,- ասել է քաղաքագետը:
Նա նաեւ հավելել է, որ այդպիսի վերաբերմունքի ճանապարհը հենց Ադրբեջանն ընտրեց՝ անտեսելով գագաթաժողովը: Երեւանի եւ Բաքվի հանդեպ ԵՄ պատասխան վերաբերմունքը հստակ տարբերակված է, ինչը միանգամայն տրամաբանական է:
