ՀՀ Ազգային ժողովը երկուշաբթի նիստի ժամանակ մեկ րոպե լռությամբ հարգել է Թբիլիսիում ջրհեղեղի հետևանքով զոհվածների հիշատակը։
ՀՀ խորհրդարանը մեկ րոպե լռությամբ հարգել է Թբիլիսիում ջրհեղեղի հետևանքով զոհվածների հիշատակը
ՍՏԵՓԱՆԱԿԵՐՏ, ՀՈՒՆԻՍԻ 15, ԱՐՑԱԽՊՐԵՍ: «Նովոստի-Արմենիա» գործակալության փոխանցմամբ՝ «բոլորս գիտենք, որ Թբիլիսիում ողբերգություն է տեղի ունեցել։ Կործանիչ ջրհեղեղը մարդկանց կյանքեր է խլել և նյութական մեծ վնաս հասցրել ։ Կիսելով Վրաստանի ժողովրդի ցավը` առաջարկում եմ մեկ րոպե լռությամբ հարգել զոհվածների հիշատակը», -ասել է ՀՀ ԱԺ խոսնակ Գալուստ Սահակյանը։
Վրաստանում երկուշաբթի սգո օր է հայտարարվել ժամանակակից Թբիլիսիի պատմության մեջ գրանցված ամենաուժեղ ջրհեղեղի հետևանքով զոհվածների հիշատակին։
Թբիլիսիում շաբաթ լույս կիրակի գիշերը հորդառատ անձրև է տեղացել, որն ուղեկցվել է կարկուտով և ուժեղ քամիով։ Այս ամենի հետևանքով վնասվել են բնակելի տները, ճանապարհները, ենթակառուցվածքային օբյեկտները։ Ջրհեղեղի հետևանքով ստացված վնասը, նախնական տվյալներով, կազմել է 22 մլն դոլար։
Պաշտոնական տվյալներով` աղետի հետևանքով զոհվել է 12 մարդ, սակայն ԶԼՄ-ները շարունակում են հայտնել, որ զոհվածների թիվն ավելի մեծ է։ Անհետ կորած է համարվում ավելի քան 20 մարդ, մոտ 40 ընտանիք մնացել է անօթևան։ Ավերվել է Թբիլիսիի կենդանաբանական այգին, որտեղից փախել են վայրի կենդանիները։ Նրանց մի մասը ոչնչացվել է։
