Հունիսի 20-ին Վարդենիս-Քարվաճառ մայրուղով Արցախ են ժամանել հիմնականում ռուսաստանաբնակ շուրջ 200 ընտանիք՝ «Արցախ» հայրենակցական միության նախագահ Վարուժան Գրիգորյանի գլխավորությամբ:
Շուրջ 200 ընտանիք ավտոերթով ժամանել են Արցախ (լուսանկարներ)
ՍՏԵՓԱՆԱԿԵՐՏ, ՀՈՒՆԻՍԻ 21, ԱՐՑԱԽՊՐԵՍ։ Հայրենի երկրամասում իրենց ամառային հանգիստը կազմակերպելու նպատակով ավտոերթով Արցախ ժամանածներին Քարվաճառի մատույցներում նրանց անձամբ դիմավորելու էր գնացել ԼՂՀ վարչապետ Արայիկ Հարությունյանը: Հանդիսավոր միջոցառմանը մասնակցում էին նաև արցախյան երիտասարդական կառույցների ներկայացուցիչներ:
«Արցախպրես»-ի հաղորդմամբ՝ երիտասարդները հայրենադարձ արցախցիներին դիմավորել են աղ ու հացով, պաստառներով ու ծափողջյուններով:
ԼՂՀ վարչապետը, ողջունելով բոլորին, հատուկ շնորհակալություն է հայտնել «Արցախ» հայրենակցական միությանը՝ ի դեմս նախագահ Վարուժան Գրիգորյանի՝ նման նախաձեռնության համար:
Ա.Հարությունյանը մասնավորապես նշել է, որ այդ նախաձեռնությունը մեծ նշանակություն ունի Արցախի ու Արցախից դուրս ապրող ծագումով արցախցիների համար:
«Նախ՝ սա հնարավորություն է տալիս յուրաքանչյուր արցախցու գոնե տարին մեկ անգամ լինել Արցախում և ապրել իր հայրենակիցների հետ: Կապե ՛ք ձեր երեխաներին ու թոռներին ձեր հայրենիքի հետ, որպեսզի նրանք չկորցնեն իրենց ինքնությունը, դրանով նաև մեծապես կաջակցեք Արցախի շենացմանը»,-ասել է վարչապետը:
Իր հերթին «Արցախ» հայրենակցական միության նախագահ Վարուժան Գրիգորյանը, ողջունելով ու շնորհակալություն հայտնելով վարչապետ Հարությունյանին նման ջերմ ընդունելության համար, ասել է. «Ես շատ ուրախ եմ և ոգևորված, որ այսքան մարդ է արձագանքել մեր առաջին կոչին: Այն, անշուշտ, շարունակական է լինելու: Իսկապես, սա մեծ հայրենսիրական քայլ է, և կարծում եմ՝ ամեն մի հայ պետք է իր գոնե մեկշաբաթյա հանգիստն անց կացնի հենց իր հայրենի հողում»:
Կոչն, ըստ Վ. Գրիգորյանի, չորս միտում ունի՝ հայրենասիրություն, տնտեսական աճ, վերաբնակեցում՝ հայրենադարձություն և անվտանգության խնդիրների ապահովում:
«Ես Մարտակերտի շրջանի Չափար գյուղից եմ: «Արցախ» հայրենակցական միության կոչին նաև մեր ընտանիքն է արձագանքել: Մենք ժամանել ենք Ռոստով քաղաքից: Ամեն տարի մեկամսյա հանգիստն անց ենք կացնում մեր հայրենիքում՝ կարոտներս առնելով հայրենի հողից»,- ասել է նախաձեռնության մասնակից Կարինե Դանիելյանը և ավելացրել, որ արդեն 24 տարի է, ինչ իրենք Արցախում չեն ապրում:
Նշենք նաև, որ միջոցառման նախաձեռնությունը պատկանում է «Արցախ» հայրենակցական միությանը:
«Արցախ» հայրենակցական միությունը կոչ էր արել աշխարհի բոլոր հայերին, և հատկապես ծագումով ղարաբաղցիներին, ովքեր ապրում են արտասահմանում, պարբերաբար այցելել հայրենի երկրամաս և ամեն տարի իրենց ընտանեկան արձակուրդի գոնե մեկ շաբաթն անց կացնել Արցախում:
