Արցախի Հանրապետության ԱԳՆ մամուլի քարտուղար Անի Սարգսյանի՝ NEWS.am-ին տված մեկնաբանությունը՝ կապված Լեռնային Ղարաբաղի եւ Ադրբեջանի զինված ուժերի շփման գծում իրավիճակի սրման հետ:
Ադրբեջանը նեղացնում է հակամարտությունը խաղաղ ճանապարհով լուծելու շրջանը. ԼՂՀ ԱԳՆ
ՍՏԵՓԱՆԱԿԵՐՏ, սեպտեմբերի 26, ԱՐՑԱԽՊՐԵՍ։ Սեպտեմբերի 25-ին Ադրբեջանի կողմից հրթիռահրետանային գնդակոծության հետեւանքով ԼՂՀ ՊԲ 4 զինծառայող է զոհվել: Նախօրեին էլ Հայաստանի Տավուշի մարզում ադրբեջանական կողմից կրակահերթերին 3 խաղաղ բնակիչ է զոհգնացել:
Ինչպե՞ս կմեկնաբանեք Ադրբեջանի այս գործողությունները:
Ափսոսանք է առաջացնում այն, որ Ադրբեջանի նման գործողությունները տեղի են ունենում այն ժամանակ, երբ ԵԱՀԿ Մինսկի խմբի միջնորդները ՄԱԿ-ի Գլխավոր վեհաժողովի 70-րդ նստաշրջանի շրջանակում հանդիպումներ են անցկացնում Հայաստանի եւ Ադրբեջանի ԱԳ նախարարների հետ՝ լարվածությունը թուլացնելու նպատակով:
Հրաժարվելով Լեռնային Ղարաբաղի եւ Ադրբեջանի զինված ուժերի շփման գծում միջադեպերի հետաքննության մեխանիզմներից եւ այդպիսով ստեղծելով եւ հետագայում օգտագործելով մի իրավիճակ, երբ միջնորդներն ի վիճակի չեն բացահայտել լարվածության սրման իրական մեղավորին, Ադրբեջանը կանխամտածված եւ նպատակաուղղված նեղացնում է ղարաբաղա-ադրբեջանական հակամարտությունը խաղաղ ճանապարհով լուծելու հնարավորությունների շրջանակը:
Շահագրգիռ միջազգային հանրությանը կոչ ենք անում գործուն միջոցներ ձեռնարկել՝ Ադրբեջանի իշխանություններին սթափեցնելու համար, եւ հետեւանքների բացառմանն ուղղված կոչերի փոխարեն իրավիճակի սրման պատճառներն արմատախիլ անելուն ուղղված քայլեր ձեռնարկել: