Բելառուսի գործող նախագահ Ալեքսանդր Լուկաշենկոն հաղթել է հանրապետության ղեկավարի ընտրություններում՝ ստանալով ընտրողների ձայների 83.49 տոկոսը, հայտարարել է ԿԸՀ նախագահ Լիդիա Երմոշինան:
Ալեքսանդր Լուկաշենկոն հաղթել է Բելառուսի նախագահական ընտրություններում
ՍՏԵՓԱՆԱԿԵՐՏ, հոկտեմբերի 12, ԱՐՑԱԽՊՐԵՍ: Գործող նախագահի լավագույն արդյունքը Մոգիլեւյան շրջանում էր, որտեղ նրա օգտին քվեարկել է ընտրողների 88.29 տոկոսը, վատագույնը՝ Մինսկում, որտեղ նա հավաքել էր 65.58 տոկոսը: Բայցեւայնպես գործող նախագահը այս ընտրություններում լավագույն արդյունքն է ապահովել՝ իր մասնակցած հինգ ընտրությունների համեմատ: 1994 թ. նա ընտրությունների երկրորդ փուլում հավաքել էր ձայների 80.6 տոկոսը, 2001 թ.՝ 75.65 տոկոսը, 2006 –ին՝ 83.0 տոկոսը, 2010 –ին՝ 79.65 տոկոսը, հայտնում է «ՌԻԱ Նովոստին»:
Երմոշինայի խոսքով, ԿԸՀ նախնական տվյալներով, «Ճշմարտությունն ասա» ընդդիմադիր շարժման ակտիվիստ, Բելառուսի պատմության մեջ առաջին կին թեկնածու Տատյանա Կորոտկեւիչը հավաքում է ձայների 4.42 տոկոսը, Լիբերալ դեմոկրատական կուսակցության առաջնորդ Սերգեյ Գայդուկեւիչը՝ 3.32 տոկոսը, Բելառուսի հայրենասիրական կուսակցության առաջնորդ Նիկոլայ Ուլախովիչը՝ 1.67 տոկոսը: Բոլորին դեմ քվեարկել է ընտրողների 6.4 տոկոսը:
ԿԸՀ ներկայացրած տվյալները չեն ներառում քվեարկության արդյունքները Բելառուսի սահմաններից դուրս՝ արտասահմանյան ընտրատեղամասերում: