Նախօրեին ԼՂՀ մշակույթի և երիտասարդության հարցերի նախարար Նարինե Աղաբալյանը «Մենք ենք, մեր սարերը» երգի-պարի պետական համույթի հիմնադրման 15-ամյակի առթիվ ընդունել և պարգևատրել է համույթի կոլեկտիվին:
Նարինե Աղաբալյանը պարգևատրել է «Մենք ենք, մեր սարերը» համույթի անդամներին
ՍՏԵՓԱՆԱԿԵՐՏ, դեկտեմբերի 18, ԱՐՑԱԽՊՐԵՍ: ԼՂՀ մշակույթի և երիտասարդության հարցերի նախարաարության մամլո ծառայության փոխանցմամբ՝ Ն. Աղաբալյանը շնորհավորանքի իր խոսքում նշել է. «Մենք կարևորում ենք «Մենք ենք, մեր սարերը» երգի-պարի պետական համույթի գործունեությունը ազգային մշակույթի պահպանման և տարածման գործում: Համույթի գործունեությունն առաջին հերթին ուղղված է հենց մշակութային ինքնության պահպանմանը: Դուք կարողանում եք ճիշտ ներկայացնել արցախցու ոգին: Անելիքներ դեռ շատ կան, մեր յուրաքանչյուր ստեղծագործական օրը պետք է նպատակային օգտագործենք և հասնենք արժանավայել մակարդակի»:
Նշենք, որ «Մենք ենք, մեր սարերը» երգի-պարի պետական համույթը հիմնադրվել է 2000 թվականին: Համույթը բազմիցս ելույթներ է ունեցել ԼՂՀ ՊԲ զորամասերում, հանդես է եկել ոչ միայն Արցախում, այլև Հայաստանի Հանրապետության, Ռուսաստանի, Լիբանանի, Վրաստանի, Պարսկաստանի մի շարք քաղաքներում: Ներկայումս «Մենք ենք, մեր սարերը» երգի պարի պետական համույթը Արցախի ազգագրության գոհարները փրկելու գործում ակտիվ գործունեություն է ծավալում:
