Հունվարի 21-ի դրությամբ Արցախի հանրապետության բժշկական կենտրոններում վերին շնչառական ուղիների սուր վարակիչ հիվանդությունների (ՎՇՍՈՒՎ) պատճառով ստացիոնար բուժում են ստանում 114 հիվանդ, այդ թվում 49-ը մինչև 18 տարեկան:
Արցախի բուժհաստատություններում գրիպով հիվանդների բուժումն իրականացվում է անվճար
ՍՏԵՓԱՆԱԿԵՐՏ, հունվարի 21, ԱՐՑԱԽՊՐԵՍ: Այս մասին «Արցախպրես»-ին տեղեկացրեցին ԼՂՀ առողջապահության նախարարության մամլո ծառայությունից: Հոսպիտալացված 65 հիվանդի մոտ ախտորոշվել է թոքաբորբ, որից 15-ը մինչև 18 տարեկան: Հիվանդների վիճակը գնահատվում է «բավարար»:
Վերակենդանացման բաժանմունքներում բուժում են ստանում 3 հիվանդ. բժիշկների հավաստմամբ՝ նրանց վիճակը միջին ծանրության է:
Առողջապահության նախարարության մասնագետները շարունակում են կանխարգելիչ միջոցառումները, ամենօրյա մշտադիտարկումները, բակային համայցերը: Ուշադրության կենտրոնում են ինչպես մայրաքաղաքի, այնպես էլ շրջանների բժշկական հաստատությունները:
Նշենք նաև, որ հունվարի 20-ի դրությամբ, վերին շնչառական ուղիների սուր վարակիչ հիվանդությունների պատճառով Արցախի հիվանդանոցում բուժում ստացողների պատկերը հետևյալն էր. հանրապետության ստացիոնարներում հիվանդների թիվը 108 էր, այդ թվում՝ 45-ը մինչև 18 տարեկան: Բուժում ստացողներից 63 հիվանդի մոտ ախտորոշված էր թոքաբորբ, որից 14-ը մինչև 18 տարեկան: Հիվանդների վիճակը գնահատվել է բավարար: Վերակենդանացման բաժանմունքներում բուժում են ստացել 2 հիվանդ, ըստ բժիշկների նրանց վիճակը միջին ծանրության է: