Հավաքական անվտանգության պայմանագրի կազմակերպությունն արձագանքել է, արձագանքում է և կարձագանքի ցանկացած գործողության, որն ազդում է անդամ-երկրների անվտանգության իրավիճակի վրա:
ՀԱՊԿ-ն արձագանքել է ու կարձագանքի անդամ-երկրների անվտանգության դեմ ուղղված գործողություններին. Բորդյուժա
ՍՏԵՓԱՆԱԿԵՐՏ, փետրվարի 12, ԱՐՑԱԽՊՐԵՍ-ԱՐՄԵՆՊՐԵՍ: Այս մասին փետրվարի 12-ին Աստանա-Երևան-Մոսկվա տեսակամուրջի ժամանակ հայտարարեց ՀԱՊԿ գլխավոր քարտուղար Նիկոլայ Բորդյուժան` անդրադառնալով հայ լրագրողի հարցին, թե ինչն է խանգարում կազմակերպությանը հայտարարություններ անել` ի պատասխան Հայաստանի Հանրապետության դեմ Ադրբեջանի գործողությունների: «Հայտարարություններ արվում են ՀԱՊԿ անդամ-երկրների ղեկավարների, արտաքին գործերի նախարարների և այլ պաշտոնյաների մակարդակով Կովկասում իրավիճակի հետ կապված: Երբ հայկական լրատվական դաշտի առանձին ներկայացուցիչներ հայտարարում են, որ ՀԱՊԿ-ը չի արձագանքում, ինձ համար զարմանալի է: Մենք ամենամյա հայտարարություններում անդրադառնում ենք հարցին»,- ասաց Բորդյուժան: Նա հավելեց, որ մեկ ամիս առաջ ռուսական հեռուստաալիքներից մեկի եթերում, մեկնաբանություն տալով Լեռնային Ղարաբաղի հիմնախնդրի առնչությամբ, նշել է, որ հայ-ադրեջանական սահմանին ու շփման գծում լարվածության էսկալացիան անընդունելի է: «Այդ կապակցությամբ ես կարծում եմ, որ հայտարարությունները բավարար են, ու ոչինչ չի ազդում մեր կազմակերպության հեղինակության վրա»,-ավելացրեց պաշտոնյան:
Բորդյուժան նկատեց, որ իրավիճակի մոնիտորինգ իրենք միշտ իրականացնում են, ինչն ամրագրվում է տարեկան հաշվետվություններում: Իսկ ԼՂ հիմնահարցի առնչությամբ դիրքորոշումը հստակ է: «ՀԱՊԿ բոլոր անդամները կողմնակից են, որ կոնֆլիկտը լուծվի քաղաքական միջոցներով, միայն խաղաղ ճանապարհով: Բոլոր երկրները դեմ են սահմանին ծանր տեխնիկայի կիրառմանն ու իրավիճակի սրմանը»:
