Այս տարվա հունվարի 1-ի դրությամբ ԼՂՀ-ում խոշոր եղջերավոր անասունների գլխաքանակը կազմել է 53 հազար 280 գլուխ՝ նախորդ տարվա նույն ժամանակահատվածի 58 հազար 311 գլխի փոխարեն:
Հանրապետությունում նվազել է անասնագլխաքանակը. գյուղնախարարի պարզաբանումը
ՍՏԵՓԱՆԱԿԵՐՏ, փետրվարի 16, ԱՐՑԱԽՊՐԵՍ։ Այդ մասին այսօր կայացած մամլո ասուլիսում տեղեկացրել է ԼՂՀ գյուղատնտեսության նախարար Արամ Մխոյանը՝ ներկայացնելով 2015 թվականին գյուղատնտեսության բնագավառում իրականացված աշխատանքները:
Գյուղնախարարի հաղորդմամբ՝ կովերի գլխաքանակը հանրապետությունում այս տարվա հունվարի 1-ի դրությամբ կազմում է 21 հազար 960, խոզերինը` 23 հազ 289, մանր եղջերավոր անասուններ` 98 հազար 971 գլուխ է, թռչուններ` 378 հազար 421 թև: Ընդհանուր առմամբ, նախորդ տարվա համեմատ խոշոր եղջերավոր անասունների գլխաքանակն այս տարի նվազել է 5031-ով, իսկ խոզերի գլխաքանակն աճել է 10 հազ. 434 գլխով:
Գյուղնախարար Ա. Մխոյանը նշել է, որ խոշոր եղջերավորների գլխաքանակի նվազման պատճառն անցած տարի հանրապետությունում արձանագրված ,Ծաղիկե հիվանդությամբ պայմանավորված հարկադիր մորթն է եղել:
«Անցած տարի հանրապետությունում բռնկված ծաղիկ հիվանդությամբ, ընդհանուր առմամբ, վարակվել է 2503 գլուխ կենդանի, որը կազմում է ընդհանուր հոտի 4.7 %-ը: Այդ հիվանդությամբ վարակված անասուններից 2433-ը բուժվել են, 26-ը՝ առողջացման փուլում են, իսկ հիվանդության պատճառով անասնագլխաքանակի անկումը կազմել է 44 »,-մանրամասնել է գյուղնախարարը՝ հավելելով , որ Արցախում անասունների դաբաղ տեսակի հիվանդություն առայժմ չի գրանցվել :
Հաշվետու տարում խոշոր եղջերավոր անասունների բրուցելյոզ հիվանդության նկատմամբ կատարվել է 47361 սերոլոգիական քննության 208 -ի արդյունքները դրական են եղել, այսինքն՝ հաստատել են, որ տվյալ անասունները վարակված են բրուցելյոզով, իսկ 2014-ին կատարվել է 48301 սերոլոգիական քննություն, որից՝ 262-ը դրական:
Անդրադառնալով խոզաբուծության ճյուղին՝ Ա. Մխոյանը տեղեկացրել է, որ խոզաբուծության զարգացման նպատակով մշակվել է խոզամերունների և կերի արժեքի փոխառությամբ տրամադրման կարգը: Բացի այդ՝ անցած տարի տոհմային անասնաբուծության զարգացման և տեղական նախրի մթերատվության բարձրացման նպատակով, պետական աջակցությամբ «Տոհմային կայան» ՓԲԸ-ից՝ 54 գլուխ, իսկ «Արմ-ագրո» ՍՊԸ-ից՝ 44 գլուխ տոհմային ցուլեր են տրամադրվել անասնաբուծությամբ զբաղվող տնտեսվարողներին:
Նախարար Ա. Մխոյանի խոսքով՝ անցած տարի բարձրացվել է կովերի կաթնային մթերատվությունը, աճի տեմպը կազմել է 110,7 տոկոս, որը պայմանավորված է տեղական նախրի մթերատվության բարձրացման ուղղությամբ իրականացվող ծրագրերի` տոհմային ցուլերի տրամադրմամբ և արհեստական սերմնավորման իրականացմամբ:
