Պատարագի ընթացքում Հայաստանի և Արցախի անսասանության համար իրականացվել է «Կարգ Մաղթանաց Վասն Հայաստան և Արցախ Աշխարհաց»-ի արարարողություն, իսկ հայկական բանակի նահատակների ու խաղաղ բնակիչների հոգիների հանգստության համար՝ հոգեհանգստյան պաշտոն: Օրվա պատգամը փոխանցել է Բարսելոնայի Հայկական մշակութային միության ատենապետ պրն․ Տաթև Սուլեանը: Նա ամփոփ ներկայացրել է Լեռնային Ղարաբաղի Հանրապետության պատմությունը` անդրադառնալով «Միացում» շարժման ժամանակագրությանը, իրադարձություններին, ազատագրական պայքարի հանգրվաններին` հասնելով մինչև զինադադար: Սուլեանը կոչ է արել, որ ամեն մի հայ իր իսպանացի ու կատալոնացի ընկերների հետ Արցախի հակամարտության մասին զրուցելիս հիշեցնի, որ արցախահայությունն օրինական ճանապարհով և ժողովուրդների ինքնորոշման իրավունքի հիման վրա է ձեռք բերել իր անկախությունը, որը, սակայն, միջազգայնորեն չի ճանաչվել: Սուրբ պատարագի ավարտին Բարսելոնայի Հայկական մշակութային միության մեկօրյա դպրոցի սաները հայրենասիրական երգերով եզրափակել են հավաքը: