Չեմպիոնների լիգայի որակավորման մրցաշարի 2-րդ փուլի պատասխան խաղում Երևանի «Ալաշկերտ»-ը ուժերն է չափելու Թբիլիսիի «Դինամո»-ի հետ:
Չեմպիոնների Լիգա. Աբրահամ Խաշմանյանը հույս ունի հաջողության հասնել Երևանյան խաղում
ՍՏԵՓԱՆԱԿԵՐՏ, 18 հուլիսի, ԱՐՑԱԽՊՐԵՍ: Պատասխան հանդիպումից առաջ երևանյան թիմի գլխավոր մարզիչ Աբրահամ Խաշմանյանը նախախաղային ասուլիսում պատասխանեց լրագրողների հարցերին:
- Հարցազրույցներից մեկում նշել էիք, որ պատրաստ եք անգամ 2 պաշտպաններով գործել. ինչպիսի՞ն է դրությունը հիմա:
- Արդեն 3-ն ունենք: Ալեքսանդր Տասիչը մարզվում է, բազում ներարկումներ են արել, որպեսզի կարողանա խաղալ: Նա լինելու է մեկնարկային կազմում:
- Ինչպիսի՞ն է տրամադրվածությունը. ճզմելու եք մրցակցին:
- Տրամադրությունը շատ լավ է. տղաները պատրաստ են: Պատրաստ ենք առաջին րոպեներից անցնել հարձակվողական գործողությունների: Չմոռանանք, որ անպայման պետք է բալանսը պահել, պետք է գոլ չընդունենք:
Շատ եմ կարևորում երկրպագուների գործոնը: Ցանկանում եմ, որ շատ մարդիկ լինեն՝ անկախ խաղի ընթացքից: Թիմը պետք է զգա, որ երկրպագուներն իրենց մեջքին են: Կուզեմ, որ «Հանրապետականը» գոնե կիսով չափ լեցուն լինի:
- Մրցակցի մասին կարծիքն ինչպիսի՞ն է:
- «Դինամոն» լավ թիմ է: Ռեալ նայենք. պատահական չէ, որ իրենց թիմում հավաքականի 7 ֆուտբոլիստներ կան: Օտարկրացի հիանալի ֆուտբոլիստներ ունեն, իրենց հարձակվողներից մեկը տեղափոխվել է Կիևի «Դինամո»... այս ամենը մեծ ներուժի մասին է խոսում: Բյուջեից էլ խոսելիս կհասկանանք, թե ինչքան ուժեղ թիմ է: Մեզնից շատ-շատ է տարբերվում: Գիտեք, որ մեր համար երկրորդական է. մեկ նպատակ կա՝ հաղթանակը: Պարզապես տարբերությունն եմ նշում:
- «Սանտա Կոլոմայի» հետ հանդիպումից հետո նշել էիք, որ ամեն դեպքում, Մանասյանը «Դինամոյի» դեմ 2-րդ խաղում կլինի, սակայն իմացանք հեռացավ թիմից...
- Ես էլ ձեզ պես միամիտ եմ իմացել: Այս հարցով ավելորդ գրառումներ են եղել Բագրատ Նավոյանի հասցեին. այդ ամենը չի համապատասխանում իրականությանը: Միհրան Մանասյանը որակազրկվել է 3 խաղով: Խաղի հաջորդ օրը Միհրանն ինձ զանգահարեց, ասաց, որ հրավեր ունի և գնում է: Մանասյանն առանցքային ֆուտբոլիստ է եղել մեզ համար, մեծ ավանդ ունի: Մինչ դա, նա նախագահի հետ պայմանագիրը խզել է: Ես էլ իմ հերթին ջերմ խոսքերով ճանապարհի իրեն: Ամեն դեպքում, ինքը լրատվամիջոցներին պետք է իր շնորհակալական խոսքը հայտներ, որպեսզի այդ ավելորդ խոսակցությունները չլինեին:
Ես ուրախ եմ, որ ֆուտբոլիստը նոր մարտահրավերների են գնում: Ոչ միայն Մանասյանը, բոլորի առումով բաց ենք: Լսել եմ, թե իբր պատժել եմ իրեն, ուղարկել եմ Միացյալ Էմիրություններ... այդպիսի ինչ-որ անիմաստ բաներ: Ես եթե պատժեի, ֆինանսապես կպատժեի: Թողեցի նախագահի հայեցողությանը. Նավոյանը լավ և բարի տղա է, պարգևավճար էլ է տվել Մանասյանին և ճանապարհել:
- Հարձակման գծում բացն առաջնության համար ինչպե՞ս եք լրացնելու:
- Համալրման գործընթացն ընթանում է: Պարզապես կենտրոնացած են վաղվա հանդիպմանը: Կրկնում եմ՝ մենք հարձակվողական ոճի լավ ֆուտբոլիստներ ունեն՝ Դաշյանը, Մելքոնյանը, փորձում ենք նաև Արթուր Եդիգարյանին ավելի առաջ տանել:
Անընդհատ Էբերի հարցն է շոշափվում: Բրազիլացիները շատ «բջոտ» են. նա ասում է, որ համաձայն է 4 ամսով գալ, իր ցանկալի աշխատավարձի կրկնապատիկը ստանալ ու գնալ: Բայց միայն 1.5-2 ամիս է հարկավոր, որ նա լավ ֆունցիոնալ վիճակի գա: Այնտեղ ոչնչով չի զբաղվել: Իրենք մտածում են այլ բաների մասին: Միհրանի հարցն ինչ-որ տեղ հնարավոր է շոշափել, ֆուտբոլ է, գուցե իր մոտ չստացվի, կվերադառնա: Էբերի հարցը փակված է:
- Մրցակցի ուժեղ և թույլ կողմերի մասին ի՞նչ կասեք:
- Ինքս նախորդ հանդիպումը դիտել եմ 3, իսկ թիմի հետ 1 անգամ. պարզապես չեմ ցանկացել ծանրաբեռնել ֆուտբոլիստների գլուխները: Լավ վերլուծություն ենք արել, կանգնել ենք մեր սխալների վրա: Սովոր ենք վրացական ֆուտբոլը տեսնել անհատական գործողությունների հիման վրա, սակայն նշեմ, որ թիմային լավ ֆուտբոլ են խաղում:
- Հարցազրույցներից մեկում ասել եք, որ ցանկանում եք դառնալ հայկական ամենաէլիտար թիմը. ի՞նչ գործոններ են ներառված այդ ծրագրում:
- Գործոններից առաջինը բյուջեն է. պետք է բարձրացում լինի: Հարկավոր է ունենալ բարձրակարգ լեգիոներներ: Նախագահի հետ անընդհատ քննարկում ենք, ցանկանում ենք, որ այս ամենը շարունակական լինի: Էլիտարը նշանում է տիտղոսներ, տիտղոսներ և անընդհատ տիտղոսներ:
- Բայց հաշվարկե՞լ եք, որ այդ աշխատանքներն անելու եք Հայաստանում, ուր առաջնությունը շատ թույլ է:
- Այժմ ոչ միայն մենք, «Շիրակը» ևս Հայաստանի համար լավ վիճակում է: Պետք է ճիշտը խոսենք. չենք հասել այն մակարդակին, որ 2-րդ փուլն անցնենք. պետք է ամեն ինչ հաշվի առնել: Անդորրայի թիմին անցնում ենք, Լիխտեյնշտեյնի, ինչի թիմ էր, հա՜, Ջիբրալթարի... չանցանք այդ թիմին, ներողություն: Իմ կարծիքն է, որ սա մեր մաքսիմումն է: Եթե ցանկանում ենք 2-րդ փուլն էլ անցնել, դա կլինի հրաշքի իրագործում: Պետք է համակարգ գործի: Որտեղի՞ց անցնենք 2-րդ փուլը. ես միշտ ասում եմ այն, ինչ մտածում եմ և այն, ինչ կա: Թող ոչ մեկ չաշխատի իրենից բարձր թռնի և մեծ-մեծ խոսի:
