ԼՂ հակամարտության կարգավորման հարցում կողմերը հաջողության կարող են հասնել միայն Ղարաբաղի ամենաակտիվ մասնակցությամբ.
Հակամարտության լուծումը հնարավոր է միայն ԼՂ ամենաակտիվ մասնակցությամբ. ԱԺ պատգամավոր
ՍՏԵՓԱՆԱԿԵՐՏ, 6 օգոստոսի, ԱՐՑԱԽՊՐԵՍ: Tert.am-ի հետ զրույցում այս մասին ասաց Լեռնային Ղարաբաղի Հանրապետության Ազգային ժողովի պատգամավոր Վարդգես Բաղրյանը՝ անդրադառնալով կարգավորման շուրջ միջնորդ երկրների քննարկումների ակտիվացմանը և Ռուսաստանի արտաքին գործերի նախարար Սերգեյ Լավրովի հայտարարությանը, թե Ղարաբաղյան կարգավորման հարցում «կողմերը, ավելի քան երբևէ, մոտեցել են հաջողության հեռանկարին»։
«Ժամանակն է, որ Ղարաբաղն ամենաակտիվ մասնակցությունն ունենա ԼՂ հակամարտության կարգավորման բանակցություններում: Մենք շատ ենք այդ մասին խոսում, բայց չենք ասում միայն ասելու համար, բնականաբար: Բոլորն էլ գիտեն, որ որևէ մեկն առանց Ղարաբաղի բնակչության կամարտահայտության չի կարող լուծել այդ խնդիրը, դա մեր ժողովրդի խնդիրն է և մեզ է վերաբերում նախևառաջ»,-ասաց նա:
Վարդգես Բաղրյանի խոսքով՝ փուլային տարբերակով լուծման մասին Ալիևի կողմից Վարշավայում հայտարարությունը նորություն չէ, բայց զուգահեռ հստակ է նաև հայկական կողմի պահանջը, որը ՀՀ Նախագահն է ներկայացրել, որ ստատուս քվոն կարող է փոխվել, եթե ճանաչվի ԼՂՀ-ի ժողովրդի ինքնորոշման իրավունքի իրացումը:
«Փուլային տարբերակը բնականաբար մեզ համար միանգամայն անընդունելի է, և ստատուս քվոն խախտելն է անընդունելի, քանի դեռ չի լուծվում անկյունաքարային հարցը, որը ԼՂՀ-ի կարգավիճակի հարցն է: Այս օրերին և ՀՀ-ում և ԼՂՀ-ում մարդիկ պարբերաբար խոսում են այդ մասին, ինչ-որ ճնշումների մասին են նշում, որոնք աբսուրդի հասնող խոսակցություններ են: Անհնար է անել միակողմանի ինչ-որ զիջումներ»,-ասաց նա:
ԼՂՀ պատգամավորի խոսքով՝ հարցի լուծումը կարող է լինել միայն փաթեթով:
«Եթե կուզեն իմանալ, ապա հենց կարգավիճակի հարցից հետո միայն կարող են նստել բանակցությունների սեղանի շուրջ և մտածեն, թե ինչ քայլեր կարող են անել: Ալիևը Վարշավայում ելույթ է ունեցել, նույն երգն է երգել, կորսված հողերի մասին է խոսել՝ մոռանալով, որ նույն Ադրբեջանի տիրապետության տակ է գտնվում ԼՂՀ-ի միգուցե 20 տոկոսից ավելին՝ սկսած Շահումյանից, Մարտակերտի շրջանի գյուղերից, Մարտունու շրջանից, էլ չենք խոսում Արցախի մեր պատմական հողերից: Այնպես որ սին խոսքեր են բոլոր այդ ճնշումները, և հետո ճնշումներն էլ առաջին անգամ չեն, մենք սովոր ենք և կարող ենք ընդունել նաև այդ մարտահրավերը»,-ասաց նա:
Վարդգես Բաղրյանը փոխանցեց Արցախի հասարակության տրամադրությունները:
«Անկեղծորեն ասեմ՝ մտահոգություն կա, մարդկանց մոտ խոսակցությունների թեման դա է, բայց ասել, թե ինչ-որ խուճապային տրամադրություններ կան, բնականաբար այդպես չէ: Մենք բազմիցս ասել ենք՝ Արցախը ազատագրել ենք ազգովի, և անհնար է, որ որևէ մեկը որոշում ընդունի և ինչ-որ տարածքներ զիջի, ուղղակի անհնար է նման բան։ Ուզում եմ՝ մայր Հայաստանը հանգիստ լինի՝ առանց ինձ, քեզ և յուրաքանչյուր հայի հարցնելու որևէ մեկը չի կարող նման պատասխանատվություն վերցնել իր վրա, որովհետև ժողովուրդը որևէ մեկին նման լիազորություն չի տվել»,-ասաց նա:
ԼՂՀ պատգամավորը նկատել է՝ ՌԴ-ն փորձում է նախաձեռնությունը վերցնել իր ձեռքը և ինքը իր ձեռքով հարցին լուծում տալ: «Բայց վաղուց խորհրդային ժամանակներն անցել են, և այդ երկաթյա վարագույրը, որ կար բարեբախտաբար, հիմա չկա, և բարեբախտաբար ՌԴ-ի ձեռքերում չէ խնդրի լուծումը: Այստեղ տարածաշրջանային մեծ խնդիրներ կան, շահեր կան և այստեղ ոչ միայն գլոբալ խնդիրներ են լուծվում։ Բնականաբար նույն Եվրոպան, Միացյալ Նահանգները չեն կարող անտարբեր լինել, և այդ մասին է վկայում նաև եռակողմ հանդիպումը, որից ՌԴ-ն պաշտոնապես հրաժարվեց և ասաց, որ Մինսկի խումբը պետք է զբաղվի ԼՂ հարցով, այսինքն՝ դա ասվեց Օբամա-Պուտին հեռախոսազրույցից հետո: Անձամբ ես շատ կարևորում եմ, և այստեղ կողմերից որևէ մեկը չի կարող իր վրա վերցնել նախաձեռնությունը և ասել, որ այսպես եմ ուզում տեսնել լուծումը»,-ասաց նա:
ԼՂՀ պատգամավորը նշեց, թե 90-ականներին տեսածը չեն մոռացել, որ այսպես հեշտությամբ համաձայնեն Ռուսաստանի միակողմանի միջնորդ առաջարկություններին:
«Մենք չենք մոռանում, որ եղել է «Օղակ» օպերացիա, այդ սև օրերը մենք հո չե՞նք մոռացել, և ուստի մենք մեր ճակատագիրը որևէ մեկի ձեռքը չենք կարող տալ: Մենք ո՛չ ռուսամետ, ո՛չ եվրոպամետ, ո՛չ ամերիկամետ պետք է լինենք, մենք պետք է հասկանաք, որ մեր ճակատագիրն ինքներս պետք է լուծենք, քանի որ մեր իրավունքի ու լինելիության հարցն է, և ապրիլյան պատերազմը դա մեկ անգամ ևս վկայեց: Դուք տեսնեիք, թե այստեղ ինչ էր կատարվում. հեռավոր Ավստրալիայից հազարավոր տղաներ, ովքեր 90-ականներին այստեղ մարտնչում էին, վերադարձել էին, որպեսզի պաշտպանեն իրենց հայրենիքը, այսինքն՝ այնպես չի, որ ինչ-որ մեկին սպասենք, ասենք՝ դե լավ, դուք ոնց ասեք, այդպես համաձայն ենք ձեզ հետ»,-ասաց նա: