Այսօր Ստեփանակերտի Վերածննդի հրապարակում տեղի է ունեցել ռուսաստանաբնակ հայազգի բարերար Արթուր Վարժապետյանի կողմից ԼՂՀ մի շարք պետական կառույցներին նվիրաբերված 15 «Շեվրոլետ Նիվա» և «ՈւԱԶ» ավտոմեքենաների հանձնման հանդիսավոր արարողությունը:
Արթուր Վարժապետյանն արցախցիներին հերթական նվիրատվությունն է արել
ՍՏԵՓԱՆԱԿԵՐՏ, 5 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` միջոցառմանը բացման խոսքով հանդես է եկել ԼՂՀ աշխատանքի և սոցիալական հարցերի նախարար Սամվել Ավանեսյանը` նշելով, որ Արցախում հերթական ուշագրավ իրադարձությունն է տեղի ունենում:
«Հայոց նորագույն պատմության մեջ նման իրադարձությունն այս էլ քանիերորդ անգամ աշխարհին ակնհայտ ցուցադրում է աշխարհասփյուռ հայ ժողովրդի միասնականությունն ու համախմբվածությունը համազգային խնդիրների շուրջ: Այս տոնական օրերին դարձյալ այստեղ մեզ հետ է հերթական բարեգործական առաքելությամբ ռուսաստանաբնակ մեր ազգակից, հայտնի գործարար-բարերար Արթուր Վարժապետյանը»,-նշել է Ս. Ավանեսյանը:
Հանդիսավոր արարողությանը Հայ Առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանն իր օրհնանքի խոսքն է հղել հայ ժողովրդի մեծ բարերարին:
Մեզ հետ զրույցում Արթուր Վարժապետյանն էլ իր խոսքում նշել է. «Իմ ցանկությունն է, որ Արցախում խաղաղությունը տևական լինի, և մենք էլ մեր հայրենանվեր մտահղացումներն իրականացնենք հայրենաշինության գործում: Ավանդույթի համաձայն` ամեն տարի սեպտեմբերին բարեգործական ծրագրով գալիս եմ Արցախ: Շուրջ 10 տարի է ես Արցախի կողքին եմ: Հպարտ եմ , որ գոնե այսպես կարողանում եմ իրականացնել; հայրենիքիս սատարելու իմ որդիական պարտքը»:
Քաշաթաղի շրջանի Արծվաշեն համայնքի ղեկավար Արթուր Յերանոսյանը, ով ևս մեքենա է ստացել իր շնորհակալական խոսքում ասել է. «Մենք մեր խորհին շնորհակալությունն ենք հայտնում Արթուր Վարժապետյանին` մեր համայնքին «ՈՒԱԶ» մակնիշի մեքենա նվիրաբերելու համար: Նրա արարքը հայրենասիրության վառ օրինակ է և, կարծում եմ, որ նրա օրինակին կհետևեն շատերը»:
Իսկ Ասկերան քաղաքի բնակիչ Անդրանիկ Բադալյանը, ով ևս «ՈՒԱԶ» մակնիշի մեքենա է ստացել, ևս իր գոհունակությունն է հայտնել բարերարին` մասնավորապես ասելով. «15 տարի է ինչ զբաղվում եմ հողագոծությամբ: Հողի մշակիս համար մեծ պատիվ է այսպիսի ուշադրության արժանանալը շնորհակալ եմ նրան ու նրա նման բարերարին, ովքեր օտարության մեջ ապրելով հոգով ու սրտով իրենց հայրենիքի հետ են: Սա իրոք իսկական հայրենասերի արարք է»:
Միջոցառմանը ներկա էին ԼՂՀ նախագահ Բակո Սահակյանը, ԱԺ նախագահ Աշոտ Ղուլյանը, վարչապետ Արայիկ Հարությունյանը, պաշտոնատար այլ անձինք և այլք:
Հիշեցնենք, որ սոցիալ-տնտեսական կարևորագույն խնդիրների իրականացման գործում հայրենիքին ցուցաբերած աջակցության համար և ի նշանավորումն Լեռնային Ղարաբաղի Հանրապետության հռչակման 25-րդ տարեդարձի` ԼՂՀ նախագահ Բակո Սահակյանն այսօր Արթուր Վարժապետյանին է հանձնել «Մեսրոպ Մաշտոց» շքանշան:
