Գանձասարի վանական համալիրի հարևանությամբ գործող Մատենադարանի արցախյան մասնաճյուղը՝ «Մատենադարան-Գանձասար» գիտամշակութային կենտրոնը տեղացի և օտարերկրյա այցելուների մեծ հոսքեր է ընդունում:
«Գանձասար» գիտամշակութային Մատենադարանն ունի մեծ թվով այցելուներ
ՍՏԵՓԱՆԱԿԵՐՏ, 19 սեպտեմբերի, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասել է Մատենադարանի արցախյան մասնաճյուղի ցուցասրահի պատասխանատու Ֆլորա Ահարոնյանը, ով պատմել է, որ Մատենադարանի 6 ցուցասրահներում ներկայացված են վաղ միջնադարից մինչև նոր շրջանն Արցախում ստեղծված 100-ից ավելի ձեռագրերի և Արցախի պատմությանն առնչվող հազվագյուտ վավերագրերի բնագրեր և ընդօրինակություններ, ինչպես նաև հնատիպ գրքեր և արխիվային փաստաթղթեր:
Մատենադարան տանող ճանապարհը բանուկ է. ամռանն օրական այցելում է մոտ 80-300 հոգի: Հունիսին շաբաթական 462 հաճախորդ ենք ունեցել, հուլիս ամսին` 4800, իսկ օգոստոսին` 3100, որից 1464-ը` զինվոր: Սեպտեմբերին` այս պահի դրությամբ, արդեն 1000 այցելու է գրանցվել: Մատենադարանի արցախյան մասնաճյուղում ներկայացված են Արցախում գրչագրված կամ այնտեղ պահված մի շարք ձեռագրեր:
«Երևանի Մատենադարանի արցախյան մասնաճյուղը, տեղացի և օտարերկրյա այցելուներին ընդունելուց զատ, Արցախի գիտական և մշակութային կյանքի աշխուժացմանն ուղղված մի շարք նախաձեռնություններով և ծրագրերով է հանդես գալիս: Մատենադարանի տնօրեն Հրաչյա Թամրազյանի կարգադրությամբ Երևանի Մատենադարանի մի շարք գիտաշխատողներ, զբոսավարներ հաճախակի գործուղվում են Մատենադարանի Արցախի մասնաճյուղ , որպեսզի գիտամշակութային կենտրոնի և մայր կառույցի՝ Երևանի Մ. Մաշտոցի անվան Մատենադարանի գործունեության ընդհանուր ուղղություններով պատշաճ և փոխկապակցված աշխատանքներ իրականացնեն»,- մեզ հետ զրույցում նշել է «Մատենադարան-Գանձասար» գիտամշակութային կենտրոնի գործունեության պատասխանատու Արամ Թորոսյանը:
Հիշեցում` Երևանի Աատենադարանի մասնաճյուղն Արցախում բացվել է 2015 թվականի նոյեմբերի 21-ին:
