Վերջերս նոր «ՎԷԼԱՆՍ» վոկալիստների համույթ է ձևավորվել Արցախում:
Արցախում նոր երաժշտական համույթ է ստեղծվել
ՍՏԵՓԱՆԱԿԵՐՏ, հոկտեմբերի 27, ԱՐՑԱԽՊՐԵՍ: «Արցախպրես»-ի թղթակցի հետ զրույցում Ստեփանակերտի մանկապատանեկան ստեղծագործական կենտրոնի (ՄՊՍԿ) տնօրեն, Երևանի կոնսերվատորիայի շրջանավարտ, երաժիշտ, երգահան, «ՎԷԼԱՆՍ» վոկալիստների համույթի հիմնադիր, գեղարվեստական ղեկավար Վիլեն Միքայելյանն ասել է, որ խմբում ընդգրկված են Ստեփանակերտի մանկապատանեկան ստեղծագործական կենտրոնի շրջանավարտները:
«Համույթի ստեղծման գաղափարը իմն էր, և այս ծրագրի իրականացման գործում ինձ օգնել է ՄՊՍԿ-ի վոկալ խմբի դասատու Էվելինա Ստեփանյանը: ՄՊՍԿ-ի տաղանդավոր շրջանավարտներին մասնակից անելով` որոշեցի հիմնել վոկալի համույթ: Համույթի անունը` «ՎԷԼԱՆՍ» ընտրել ենք խմբում ընդգրկված 6 անդամներս. այն կազմված է խմբի անդամներիս անունների սկզբնատառերով,-ասել է Վ. Միքայելյանը և ավելացրել,- երգում ենք Կոմիտաս, հայկական ժողովրդական երգեր, ջազ, էստրադային երգեր, արցախյան բարբառով երգեր: Երգացանկում հատուկ տեղ է զբաղեցնում հայրենասիրական երգերը: Կարևորն այն է, որ այդ երգերը մենք կատարում ենք նորովի` մեր ոճով` ոչ ոքի չկրկնելով: Մեր համույթն այս սկզբունքով է գործելու, և յուրաքանչյուր համերգային ծրագիր տարբերվելու է մյուսից»,-հավելել է համույթի գեղարվեստական ղեկավարը:
Խոսելով առաջիկա նոր ծրագրերից` Վ. Միքայելյանը նաև ասել է, որ իրենք ուսումնասիրում են արցախյան բարբառով երգեր, որոնք ընդգրկելու ենք մեր ծրագրում. առաջիկայում մենք դրանք ներկայացնելու ենք հանդիսատեսի դատին:
«Համոզմունք ունեմ, որ այդ երգերը լինելու են մեր այցեքարտը: Համույթի գլխավոր նպատակներից մեկն էլ միջազգային ասպարեզ դուրս գալն է և Արցախի մշակույթի մեր կատարածն ըստ արժանվույն ներկայացնել հանրությանը»,-ընդգծել է Վ. Միքայելյանը:
Տեղեկացնենք, որ հոկտեմբերի 24-ին Ստեփանակերտի մշակույթի և երիտասարդության պալատում կայացել է «ՎԷԼԱՆՍ» վոկալիստների համույթի առաջին համերգը:
