Մարտակերտի շրջանի Մաղավուզի միջնակարգ դպրոցում սովորում է ավելի քան 100 աշակերտ:
Մաղավուզի զարգացման համար նոր հնարավորություններ են ստեղծվել. համայնքի ղեկավար
ՍՏԵՓԱՆԱԿԵՐՏ, դեկտեմբերի 6, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Մաղավուզի համայնքի ղեկավար Աշոտ Դանիելյանը և հավելել, որ գյուղում երիտասարդների արտագաղթ չկա, իսկ վերջին տարիներին աշակերտների թիվը միայն աճում է:
«Չնայած առկա դժվարություններին` երիտասարդները շարունակում են մնալ գյուղում, աշխատել` ամուր կառչած մնալով հայրենի հողին»,- ասել է Ա. Դանիելյանը և ավելացրել, որ անցած տարի դպրոցն ավարտել է երեք աշակերտ, իսկ առաջին դասարան է հաճախել 11-ը: Կրթօջախում գործում է նաև նախադպրոցական խումբ:
Համայնքի ղեկավարի տեղեկացմամբ, գյուղն ունի 850 հեկտար վարելահող, որից 250-ը սեփականաշնորհված է: Բնակիչները հիմնականում զբաղվում են այգեգործությամբ, բանջարաբուծությամբ, անասնապահությամբ, հացահատիկային բույսերի մշակությամբ։
«Կառավարության աջակցությամբ գյուղում լուծված է խմելու և ոռոգման ջրի հարցը. ջրամատակարարումը նորմալ մակարդակի վրա է: Իսկ Վարդենիս-Մարտակերտ ավտոճանապարհին շատ մոտ լինելը մեծ հույսեր է արթնացրել բակիչների մոտ, որ այն նոր խթան կհանդիսանա գյուղի զարգացման համար»,- ասել է համայնքի ղեկավարը և ավելացրել, որ շրջկենտրոնից 15 կիլոմետր հյուսիս-արևմուտքում գտնվող Մաղավուզն ունի 507 բնակիչ:
Աշոտ Դանիելյանի հավաստմամբ` Մաղավուզում հասանելի է համացանցը: Ապահովված է նաև տրանսպորտային կապը գյուղի և մայրաքաղաքի միջև: