Արցախում դպրոցակաների ընդհանուր թիվը 2016 թվականին կազմել է 22 հազար 721 աշակերտ, նախորդ տարվա 22 հազար 619-ի փոխարեն:
Ռոբոտաշինության դասարանները ավելացվելու են. Սլավա Ասրյանը խոսել է հանրակրթական դպրոցներից
ՍՏԵՓԱՆԱԿԵՐՏ, դեկտեմբերի 27, ԱՐՑԱԽՊՐԵՍ: Այս մասին այսօր՝ դեկտեմբերի 27-ին կայացած մամլո ասուլիսի ժամանակ հայտարարել է ԼՂՀ կրթության, գիտության և սպորտի նախարար Սլավա Ասրյանը՝ հավելելով, որ ընթացիկ տարում հանրակրթական դպրոցներում բացվել են համակարգչային նոր դասարաններ, որոնք համալրված են համակարգիչներով, ընդ որում վերջերս 40 համակարգիչ նվիրաբերել է «Հայ-ռուսգազարդ» ընկերությունը:
«Վերջերս ստացել ենք նաև դպրոցական նոր գույք. մոտակա ժամանակներս դրանք կբաշխվեն համապատասխան շրջանների դպրոցների,- ավելացրել է Ս. Ասրյանը և մանրամասնել,-Կարմիր շուկայի, Ազոխի, Ուղտաձորի և Ստեփանակերտի թիվ 9 դպրոցական շենքերի շահագործման աշխատանքներն ավարտվելու են գալիք տարեսկզբին»:
Նախարարը կրթական ոլորտում կարևոր ձեռքբերում է համարել նաև տեղեկատվական տեխնոլոգիաների մուտքը հանրակրթական դպրոցներ: Առաջիկայում Արցախի դպրոցներում համացանցի օգտագործման շրջանակները ընդլայնվելու են: Մի քանի դպրոցներում առկա են ռոբոտաշինության դասարաններ, որոնք առաջիկայում կավելացվեն: Դպրոցականների մտավոր զարգացման վրա իր դրական ազդեցությունն է թողնում նաև «Թումո» ստեղծարար տեխնոլոգիաների կենտրոնը:
«Նոր ուսումնական ռազմավարություն» կրթական ծրագիրն Արցախում գործում է արգենտինահայ բարերար Էդուարդո Էռնիկյանի, Հայկական բարեգործական ընդհանուր միության և Արցախի կառավարության աջակցությամբ:
Անդրադառնալով միասնական քննություններին, նախարարն արձանագրել է, որ 1375 շրջանավարտներից քննությանը մասնակցել է 844-ը. այն կազմում է ողջ շրջանավարտների 61 %-ը:
«Դիմորդների 13 %-ը ստացել են «գերազանց» գնահատականեր, 46-ը՝ «բավարար», 16-ը՝ «լավ», իսկ 24-ը՝ «անբավարար»,-մանրամասնել է Ս. Ասրյանը՝ ավելացնելով,- բարձր են եղել դպրոցականների առարկայական օլիմպիադաների արդյունքները: Այս տարի ՀՀ առարկայական օլիպիադաների եզրափակիչ փուլում արցախցի դպրոցականներից 10-ը գրավել է առաջին տեղը, 7-ը՝ երկրորդ , 5-ը՝ երրորդ, իսկ գովասանագրի է արժանացել 16 աշակերտ: Դպրոցականները ակտիվ մասնակցել են նաև «Մեղու», «Կենգուրու», «Արջուկ» կրթական ծրագրերին. ուրախալի է, որ տարեցտարի ընդլայնվում է մասնակցողների թիվը»:
Ասրյանի տեղեկացմամբ՝ այս տարի ևս պատշաճ կերպով է կազմակերպվել արցախցի երեխաների ամառային հանգիստը. 3160 դպրոցական ընդգրկվել է Արցախի և Հայաստանի տարբեր ճամբարներում, իսկ 24 աշակերտի հանգիստն էլ կազմակերպվել է Հունաստանում:
