Բելառուսի և Ռուսաստանի միջև եղած հարաբերություններում խնդիրները աշխարհաքաղաքական նշանակություն ունեն․
ՀԱՊԿ գլխավոր քարտուղարի պաշտոնում հայի նշանակումը հետաձգելու պատճառները Մոսկվայում փնտրեք․ բելառուս փորձագետ
ՍՏԵՓԱՆԱԿԵՐՏ, դեկտեմբերի 28, ԱՐՑԱԽՊՐԵՍ: Tert.am-ի հետ զրույցում այսպես ասաց բելառուս քաղաքական մեկնաբան Յուրի Դրակախրուստը՝ խոսելով Բելառուսի նախագահ Ալեքսանդր Լուկաշենկոյի՝ Սանկտ Պետերբուրգում կայացած ԵԱՏՄ գագաթաժողովի և ՀԱՊԿ խորհրդի նիստին չներկայանալու մասին:
«Պատճառները բավականին խորն են և կայանում են նրանում, որ ընդհանուր առմամբ, Ռուսաստանին չի բավարարում Բելառուսի կեցվածքը մի շարք խնդիրների վերաբերյալ․ նրան մասնավորապես չի բավարարում Բելառուսի «սիրավեպը» Արևմուտքի հետ և Բելառուսի կեցվածքը Ուկրաինական կոնֆլիկտի և իր հետ ռազմաքաղաքական համագործակցության մակարդակը: Այդ համագործակցությունը, ճիշտ է, սերտ է, բայց Ռուսաստանն ավելին է ուզում»,- ասաց նա:
Հարցին, թե որոնք են Բելառուսի պահանջներն ու ցանկությունները Ռուսաստանի հետ համագործակցությունից, Յուրի Դրակախրուստը պատասխանեց․«Կուզեր, որ ավելի շատ փող տային կամ ինչ-որ օգտակար բան ավելի էժան վաճառեին նրան: Մյուս կողմից՝ Բելառուսը ցանկանում է իրեն հեռու պահել և՛ գոյություն ունեցող, և՛ հնարավոր լուրջ կոնֆլիկտներից»:
Նրա դիտարկմամբ՝ Բելառուսը չէր ցանկանա, որ Ռուսաստանի և Արևմուտքի և Ռուսաստանի և ՆԱՏՕ-ի միջև եղած կոնֆլիկտը ազդի Բելառուսի վրա, Բելառուսը չէր ցանկանա, որ այդ հարաբերություններն իր հետ որևէ կապ ունենան: «Մենք ցանկանում ենք, որ այդ ռազմական հակամարտությունից հեռու մնանք»,- նշեց նա:
Նա հիշատակեց, որ նախորդ տարվա վերջին Մոսկվայում ձևացրին, թե Բելառուսում ավիաբազայի ստեղծումն արդեն իրական է: «Բայց այդպես էլ դա չիրականացավ: Լուկաշենկոն սկսեց ելույթներ ունենալ, թե կպաշտպանենք Ռուսաստանը: Բայց մենք չգիտենք, թե այս ռուսական ուղղաթիռներն ուր կթռչեն, և անպայման չէ, որ դրանք Արևմուտք թռչեն, հնարավոր է՝ դրանք Հարավ թռչեին: Լուկաշենկոն չէր ցանկանա, որ առանց իր հրամանի, ինքնաթիռները թռչեին ուր որ պատահեր»,- ասաց նա:
Խոսելով Ռուսաստանի գերակայությամբ ստեղծված միության ՀԱՊԿ-ի ապագայի մասին՝ նա նշեց, որ այստեղ դաշինք ասելը սխալ է: «Մենք ասում ենք՝ ՀԱՊԿ, բայց հասկանում ենք՝ Ռուսաստան: ՀԱՊԿ-ն ՆԱՏՕ-ն չէ, այնտեղ գիտեն ով ինչով է զբաղվում: ՀԱՊԿ-ում չենք կարող ասել, որ օրինակ՝ հայ զինվորականները գնացել են Բելառուս պաշտպանելու այն: Ամեն մեկն իր գործով է զբաղվում, և դա վերջիվերջո համագործակցություն է Ռուսաստանի հետ»,- նշեց նա:
Թե ինչպիսին կլինեն հետագա հարաբերությունները Բելառուսի և Ռուսաստանի միջև, նա դժվարացավ պատասխանել՝ նշելով, որ երկուսն էլ այստեղ ունեն հաղթաթուղթ և ռիսկեր: Եվ եթե Ռուսաստանի կողմից խենթ քայլեր էլ լինեն, ապա դրանք հաշվարկված կլինեն:
«Ասել, թե Ռուսաստանը կուղարկի իր զորքերը տարբեր տեղեր, սխալ կլինի: Լուկաշենկոն էլ նման քայլերի չի դիմի, բայց նրանք կշարունակեն խաղալ»,- ասաց Դրակախրուստը:
Անդրադառնալով ՀԱՊԿ խորհրդի նիստում գլխավոր քարտուղարի պաշտոնում հայի նշանակման հարցը նորից հետաձգելուն՝ բելառուս փորձագետը նշեց, որ այստեղ պատճառները պետք է գտնել Մոսկվայում:
«Իմ հիփոթեզը հետևյալն է․ Հայաստանը ոչ այդքան հեշտ հարաբերությունների մեջ չէ իր հարևան Ադրբեջանի հետ: Որքան հասկանում եմ՝ եռակողմ՝ Երևան-Բաքու-Մոսկվա հարաբերությունները բավականին բարդ են և շատ լուրջ առաջարկություններ կան Երևանի կողմից՝ ուղղված Մոսկվային, այդ թվում նաև՝ Մինսկին: Կարծում եմ, որ հնարավոր է, որ Մոսկվայում հաշվարկել են, որ ՀԱՊԿ-ի հայ գլխավոր քարտուղարը հնարավոր է նյարդայնացնի Բաքվին: Դրա համար այս հարցում պետք է հանգիստ թողնենք Բելառուսին, որը ոչ մեկի հետ չի պատերազմում, ոչ ոքի հետ կոնֆլիկտ չունի»,- ասաց նա:
Յուրի Դրակախրուստը Հայաստան-Բելառուս հարաբերությունները որակեց՝ լավ, բայց նշեց, որ Ադրբեջանի հետ Բելառուսն ավելի ավ հարաբերություններ ունի։ «Ես չեմ կարող ասել, որ Բելառուսը անվերապահորեն պաշտպանում է ադրբեջանական կողմի շահերը, բայց նման բաները որոշում են շատ հայտնի պատճառներ, օրինակ՝ փողը»,- ասաց նա՝ հավելելով, որ Ալիևը Բելառուսին կարող է տալ փող, գազ, նավթ, իսկ Հայաստանը, ըստ բելառուս փորձագետի, ցավոք, չի կարող:
Յուրի Դրակախրուստը ամփոփեց իր խոսքը՝ նշելով, որ Բելառուսը հաստատապես հետաքրքրություն չէր ունենա ազդելու ՀԱԿՊ գլխավոր քարտուղարի պաշտոնում հայի նշանակումը հետաձգելու վրա: «Այդ հարցը կախված է Մոսկվայից, այնտեղ այն պարզաբանեք: Բելառուսին իր խնդիրները բավարար են»,- ասաց նա:
