2016 թվականը եղել է ամենաբարդ տարին՝ 1994 թվականից հետո:
Ապրիլը նույնպես դարձավ հաղթանակի ամիս, ինչպես մայիսը. այն ցույց տվեց, որ մենք ապրելու իրավունք և կարողություն ունենք. Դավիթ Բաբայան
ՍՏԵՓԱՆԱԿԵՐՏ, հունվարի 3, ԱՐՑԱԽՊՐԵՍ: Այս մասին Tert.am-ի հետ զրույցում ասաց ԼՂՀ մամուլի խոսնակ Դավիթ Բաբայանը՝ ամփոփելով 2016 թվականը: «Մենք ունեցանք անդառնալի մարդկային կորուստներ, նյութական կորուստները կարող ենք վերադարձնել, սակայն մարդկային կորուստները սարսափելի են, անկախ նրանից, որ թշնամին կրել է տասնապատիկ ավելի շատ կորուստ, մեզ համար յուրաքանչյուր զոհ անդառնալի կորուստ է»,- ասաց նա:
Դավիթ Բաբայանը նշեց, որ ապրիլյան պատերազմը նրանով էր կարևոր, որ հակառակորդը ևս մեկ անգամ ապացուցեց, թե ով է ինքը և ինչ է ուզում: «Այդ պատերազմը չի եղել լոկալ, պրովոկացիա, եղել է փորձ՝ բլից կրիկի միջոցով ոչնչացնել Արցախը, և եթե ստացվեր՝ զավթել տարածքներ նաև ՀՀ-ից, ինչը ձախողվեց: Այսինքն՝ մենք մեր պետականությունը պահպանեցինք, ինչը կարևորագույն ձեռքբերում է, թեև կորուստներն անդառնալի են»,-ասաց նա և նշեց, որ մեր պետականությունը պահպանվեց Հայաստան-Արցախ-Սփյուռք միասնության և քաջարի տղաների շնորհիվ:«Թշնամին թերագնահատեց մեզ, կարծում էր, թե փոխվել է բանակը, սերունդը: Միշտ պետք է հիշենք, թե ինչ է լինում, երբ մենք թուլանում ենք ներսից: Ապրիլյան պատերազմն իր հետքը թողեց և այդ ամենը երբ մոռանում ենք, մեր զգոնությունը կորցնում ենք, ինչը հղի է անկանխատեսելի հետևանքներով: Նոր տարուց առաջ արձանագրված վերջին դեպքերը ևս մեկ անգամ ցույց տվեցին, թե ում հետ գործ ունենք։ Աննորմալ մի պետության հետ, որը նույնիսկ նոր տարվա նախաշեմին փորձում է յուրահատուկ ձևով «շնորհավորել» տոները: Մենք պետք է իմանանք մի բան, որ երբ միասնական ենք, մենք անպարտելի ենք»,- ասաց Բաբայանը:
Ինչ վերաբերում է բանակցային գործընթացում հետընթաց արձանագրելուն և կարգավորման գործընթացից հեռանալու հարցին, Դավիթ Բաբայանը նշեց,որ Ադրբեջանը շարունակում է ֆաշիստական գաղափարախոսությամբ առաջնորդվել, և այդ դեպքում էլ ինչի՞ մասին կարող ենք խոսել: Նա վստահեցրեց, որ երբևիցե չի կարող լինել ԼՂ- վերադարձ այն վիճակին, որը եղել է նախկինում:
Ըստ Դավիթ Բաբայանի՝ բանակը 2017 թվական է մուտք գործում ավելի հաստատակամ, ավելի ուժեղ և ապրիլից հետո հակառակորդն ինչ փորձեր էլ կատարել է, բոլորը ձախողել է: «Ապրիլյան պատերազմում միջազգային հարթություններում մեր բանակը ցույց տվեց, որ ապահովում է ոչ միայն հայ ժողովրդի անվտանգությունը, այլ նաև քաղաքակիրթ աշխարհի ճակատներից մեկը պահպանող ուժն է: 2017 թվականի մեր մարտահրավերը շարունակում է մնալ խաղաղության և անվտանգության ապահովումը, մենք պետք է լինենք զգոն, որովհետև Ադրբեջանը չի վերանայելու իր մոտեցումները»,- ասաց նա:
Դավիթ Բաբայանի խոսքով՝ մեր առավելությունը հոգեբանական ոլորտում է և մեր ոգին անհամեմատ բարձր է, ինչը հակառակորդը փորձում է կոտրել: «Ինչպես հայերի պատմության մեջ մայիսը հաղթանակի ամիս է, նույնը դարձավ նաև ապրիլը։ Ապրիլ ամիսը ցույց տվեց, որ մենք ապրելու իրավունք և կարողություն ունենք»,- հավելեց նա:
Դավիթ Բաբայանը գտնում է, որ հայությունն ունի չորս հիմնական խնդիր, որոնցում պետք է լինենք միասնական. արցախյան հիմնախնդիրը, Ցեղասպանության միջազգային ճանաչումը, հայ ազգային ինքնության պահպանումը Սփյուռքում և Սևանա լճի խնդիրը:
