Լիտվայում ՀՀ դեսպան Տիգրան Մկրտչյանը հանդիպել է Լիտվայի մշակույթի նախարար Լիանա Ռուոկիտյե Յոնսոնի հետ։
Լիտվան պատրաստ է ֆիլմարտադրության բնագավառում ակտիվ համագործակցել Հայաստանի հետ
ՍՏԵՓԱՆԱԿԵՐՏ, մարտի 29, ԱՐՑԱԽՊՐԵՍ: Այս մասին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից՝ հավելելով. «Հանդիպման սկզբում դեսպան Մկրտչյանը ՀՀ մշակույթի նախարար Արմեն Ամիրյանի և իր անունից շնորհավորեց Լիանա Ռուոկիտյեին, նախարարի պաշտոնը ստանձն? ?լու կապակցությամբ՝ մաղթելով նրան բազում հաջողություններ։
Հանդիպման ընթացքում քննարկվեցին երկկողմ մշակութային համագործակցությանը վերաբերող հարցերի լայն շրջանակ։ Դեսպան Մկրտչյանը ներկայացրեց դեսպանության կողմից նախատեսվող մշակութային միջոցառումները՝ ընդգծելով, որ լիտվական կողմի հետ համատեղ հնարավոր է իրագործել տարբեր ծրագրեր՝ հաշվի առնելով այն փաստը, որ 2018 թ-ին և՛ Հայաստանում, և՛ Լիտվայում նշվելու են 1918թ․ երկու հանրապետությունների հիմնադրման հարյուրամյակները։
Անդրադառնալով առաջիկայում կայանալիք մշակութային ծրագրերին՝ դեսպան Մկրտչյանը նշեց, որ անելու է ամեն հնարավորը Հայաստանը Լիտվայում ավելի տեսանելի դարձնելու համար։
Նախարար Ռուոկիտյեն նշեց, որ լիտվական կողմը պատրաստ է ֆիլմարտադրության բնագավառում ակտիվ համագործակցել Հայաստանի հետ։ Դեսպանը նշեց, որ 2017-18 թթ․ ՀՀ դեսպանությունը նախատեսում է կազմակերպել ֆիլմերի ցուցադրություն, ցուցահանդեսներ և համերգներ։
Նախարար Ռուոկիտյեն իր գոհունակությունը հայտնեց դեսպանության կողմից կազմակերպված հայ-լիտվական դիվանագիտական հարաբերությունների հաստատման 25-ամյակին նվիրված համերգի վերաբերյալ և հույս հայտնեց նման խոշոր մշակութային միջոցառումները պարբերական բնույթ կկրեն»։
