Մարտունու Արամ Խաչատրյանի անվան արվեստի դպրոցը գործում է 1973 թվականից:
Մարտունու արվեստի դպրոց հաճախողների թիվը տարեցտարի ավելանում է. տնօրեն (լուսանկարներ)
ՍՏԵՓԱՆԱԿԵՐՏ, 11 ապրիլի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է դպրոցի տնօրեն Ալվինա Միրզոյանը:
«Արվեստի դպրոցում գործում է դաշնամուրի, վոկալի, ժողովրդական գործիքների (դուդուկ, շվի, քանոն, դհոլ, քամանչա,թառ), ջութակի, պարի, նկարչության և քանդակագործության, գոբելենի, դիզայն և հագուստի մոդելավորում բաժինները, ակորդեոնի և կլառնետի մասնագիտական դասարաններ: Արվեստի դպրոց է հաճախում 350 երեխա. ի դեպ, տարեցտարի արվեստի դպրոց հաճախողների թվի աճ է գրանցվում: Ազգային նվագարանները պահելու և պահպանելու համար տքնաջան աշխատանքներ ենք կատարում, որպեսզի երիտասարդությունը միշտ սիրի և կապված լինի դարերից եկող հայ ազգային ժողգործիքներին»,-ասել է Ա. Միրզոյանը և ընդգծել, որ դպրոցը մասնաճյուղեր ունի նաև Մարտունու շրջանի Բերդաշեն և Գիշի համայնքներում. այնտեղ ևս լուրջ աշխատանքներ են տարվում՝ տեղացի մասնագետներ պատրաստելու գործում:
Ա. Միրզոյանի խոսքով՝ արվեստի դպրոցն ապահովված է երաժշտական գործիքներով:
«Տարաբնույթ միջոցառումներ ենք կազմակերպում: Յուրաքանչյուր տարի արվեստի դպրոցը հանդես է գալիս հաշվետու համերգով, որին մասնակցում են արվեստի բոլոր բաժինների երեխաները: Համերգներով հանդես ենք եկել Մարտունու մանկապարտեզներում և դպրոցներում, Բերդաշենում, Գիշիում, Կարմիր Շուկայում. այդ հանդիպումները խթան են հանդիսանում, որ ավելի շատ երեխաններ ներգրավվեն արվեստի դպրոց: Անցած տարի ապրիլին 5 երեխա մասնակցել է Գյումրիում երաժիշտ-կատարողների «Վերածնունդ» միջազգային մրցույթ-փառատոնին և արժանացել գովասանագրերի: Այս տարվա ապրիլին Ստեփանակերտում կայացած «Գրացիա» պարային փառատոնին ևս մեր դպրոցի սաներն իրենց մասնակցությունն են բերել»,-մանրամասնել է արվեստի դպրոցի տնօրենը և հավելել, որ իրենք Հայաստանի և արտերկրի երաժշտական դպրոցների հետ կապեր ունեն. համերգային ծրագրերով փոխայցելություններ են կազմակերպվում:
Խոսելով առաջիկա ծրագրերի մասին՝ տնօրենը տեղեկացրել է, որ իրենց դպրոցի 4 երեխա մասնակցելու է մայիսի 14-15-ը Գյումրիում կայանալիք երաժիշտ-կատարողների «Վերածնունդ» միջազգային փառատոնին:
«Այս ամսին մասնակցելու ենք նաև «Ազգային պար» մրցույթ-օլիմպիադային, իսկ մայիսին՝ «Շնորհալիների «Իզաբել» կենտրոնի 12-րդ հանրապետական մրցույթին: Մեր դպրոցի երեխաների մասնակցությամբ Ամարասի վանքի մոտ տեսահոլովակ ենք նկարահանելու: Համերգային ծրագիր և նվերներ ենք պատրաստում Ստեփանակերտի երեխաների խնամքի և պաշտպանության թիվ 1 գիշերօթիկ հաստատության երեխաների համար,-ավելացրել է Ա. Միրզոյանը և ընդգծել,- մենք ամեն ինչ անում ենք՝ Մարտունիում մշակութային կյանքն ավելի աշխուժացնելու համար»:
