Այսօր Արցախի պետական համալսարանում ՀՀ Արտաքին գործերի նախարարի տեղակալ Շավարշ Քոչարյանը և Տարածաշրջանային հետազոտությունների կենտրոնի առաջատար փորձագետ Դավիթ Շահնազարյանը հանդես են եկել «ՀՀ արտաքին քաղաքականությունը գլոբալ և տարածաշրջանային մարտահրավերների ենթատեքստում» թեմայով դասախոսությամբ:
Արցախցի ուսանողներին ներկայացվել է ՀՀ արտաքին քաղաքականության գլոբալ և տարածաշրջանային մարտահրավերները
ՍՏԵՓԱՆԱԿԵՐՏ, 28 ապրիլի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ Շ. Քոչարյանն ասել է, որ աշխարհում շատ արագ փոփոխություններ են տեղի ունենում, որոնք իրենցում պարունակում են և՛ վտանգներ, և՛ հնարավորություններ:
«Առաջինն համաշխարհային ֆինանսական ճգնաժամն է, որի ալիքը մենք տեսանք, և չի բացառվում, որ այն կարող է կրկնվել: Սա խոսում է այն մասին, որ ինչ-որ բան չի համապատասխանում ներկա իրավիճակին: Երկրորդն այն է, որ նույնիսկ արևմտյան աշխարհի ժողովրդի մոտ հասունացել է փոփոխությունների տրամադրվածություն. դրա արտահայտությունն է Բրիտանիայի՝ Եվրամիությունից դուրս գալը, Դոնալդ Թրամփի անսպասելի ընտրությունը, Ֆրանսիայում ընթացող ընտրական գործընթացը: Ընդհանուր առմամբ, աշխարհում տեղի են ունենում փոփոխություններ, որոնք առաջացնում են նոր պահանջներ: Կա մի հանգամանք, որը չափազանց կարևոր է և գտնվում է ցանկացած արտաքին քաղաքականության հիմքում. դա ժողովրդագրությունն է: Այս առումով Արցախի ցուցանիշներն ավելի լավ են, քան Հայաստանինը»,- մասնավորապես ասել է Շ. Քոչարյանը:
Դավիթ Շահնազարյանն իր խոսքում նշել է, որ ինքը համոզված է, որ առաջիկա տարիներին մարդկության վրա ամենամեծ ազդեցությունը թողնելու են նոր տեխնոլոգիաները:
«Նկատի ունեմ էներգիայի նոր աղբյուրները, որոնք կապված չեն գազի և նավթի հետ: Իմ համոզմամբ՝ մարդկությունը գտնվում է այդ անցումային փուլում: Քարե դարն ավարտվել է, որովհետև տեխնոլոգիաներն անընդհատ զարգանում են: Նավթը վերջանում է, և կանաչ էներգետիկան մեծ թափով առաջ է ընթանում, ինչը փոխելու է աշխարհը:
Այն դրական է անդրադառնալու Հայաստանի վրա, որովհետև մենք նավթային երկիր չենք»,- նշել է Դ. Շահնազարյանը: Բանախոսները պատասխանել են նաև ուսանողների հարցերին: