Հայաստանի և Արցախի երիտասարդները պետք է կարողանան ինքնուրույն այնպիսի ապագա կառուցել, որն օրինակ կլինի մյուս ազգերի համար։
Արցախի ու Հայաստանի ուսանողներն անցկացրեցին համատեղ գիտաժողով
ՍՏԵՓԱՆԱԿԵՐՏ, 30 մայիսի, ԱՐՑԱԽՊՐԵՍ: Այս մասին «Հայաստանի և Արցախի Հանրապետությունների զարգացման արդի հիմնախնդիրները» ուսանողական գիտաժողովի ժամանակ ասաց ՀՀ ԿԳ նախարարի տեղակալ Մանուկ Մկրտչյանը։ Գիտաժողովը կազմակերպվել էր Երևանի Հյուսիսային համալսարանի եւ Արցախի պետական համալսարանի ուսանողական խորհուրդների համատեղ ջանքերով:
«Եթե դուք հանդգնեք ինքնուրույն ապագա կառուցել, որպեսզի այլ ազգերի համար օրինակ լինի, ապա մենք կարող ենք ասել, որ ունենք հարատևման շանս։ Մենք պետք է զբաղվենք այդ հարցով, որպեսզի մեր ազգի և պետության անկախությունը վտանգի տակ չդրվի»,- շեշտեց ՀՀ ԿԳ նախարարի տեղակալը։
Հյուսիսային համալսարանի ռեկտոր Բորիս Մակիչյանն ասաց, որ 1918 թվականին հայ ազգը շատ կարևոր բան է ձեռք բերել՝ ազգային անկախություն։
«Դարեր շարունակ հայ ժողովուրդը երազել է անկախություն ունենալ և մեզ առաջին անգամ հաջողվել է ձեռք բերել այդ անկախությունը 1918 թվականին։ Այդ ժամանակ մենք ձեռք ենք բերել ամենակարևորը՝ ազգային անկախությունը»,- ասաց Մակիչյանը։
Նա հավելեց, որ այսօրվա երիտասարդ սերունդը ամենուրեք պետք է ծառայի հայրենիքին, նպաստի երկրի հզորացմանը, այսինքն՝ յուրաքանչյուր ոք կատարի իր պարտականությունները արժանապատիվ կերպով։
Մանուկ Մկրտչյանն էլ իր հերթին պնդեց հակառակը և նշեց, որ չի ընդունում ազգային անկախություն հասկացությունը։
«Ես ավելի կողմնակից եմ պետության անկախություն արտահայտությանը։ Մեր ազգն իր ներկայիս գոյության փաստով պատմականորեն եղել է անկախ։ Ազգային անկախությունը մտածելակերպ է, մշակութային ինքնուրույնություն»,- ընդգծեց Մանուկ Մկրտչյանը։
Արցախի պետական համալսարանի ուսանողական խորհրդի նախագահ Մարիամ Ծատրյանն իր համոզմունքը հայտնեց գիտաժողովի արդյունավետության վերաբերյալ։
«Մենք՝ Արցախի ուսանողներս, շատ ենք կարևորում համագործակցային ծրագրերի իրականացումը համահայկական կրթական դաշտի բոլոր բուհերի հետ։ Համագործակցության լավագույն թևերից մեկն այսօրվա գիտաժողովն է, որի թեման շատ համահունչ է մեր ծրագրերին ու պատկերացումներին»,- նշեց Ծատրյանը։